Vegan

Jan Graf macht eine unglaubliche Bekanntschaft am Wurststand und unterhält sich mit einem vermeintlichen Promi über das Thema vegane Ernährung.

"Vegan"
Güstern an´n Busbahnhoff, dink ik, na, hest noch 'n Viddelstünn, haalst di vörn noch gau en Braadwuss mit Stück Broot, steiht dor so'n öllern Herrn an'n Imbiss, stell ik mi blangen em so hen, segg, eine Bratwurst mit Brot bitte, beluer ik mi den Kerdl vun de Siet so'n beten, dink ik, den kinnst doch, dor is dat Arnold Schwarzenegger dor blangen mi. Un dat weer he denn ok würklich. Kinn em jo.
Conan der Babar, Terminator, Gouverneur vun Kalifornien hett he ok mal speelt. Steiht dor un itt schöön Schaschlik, ok Stück Brot dorbi, ik segg Herr Schwarzenegger, ich hab mal gelesen, dass Sie sich nur vegan ernähren, und jetzt hier schön Schaschlik…
Ik meen, nich dat mi dat wat utmaakt, harr jo sülvst schöön Braadwuss, blots, dat över mi nix in de Zeitung steiht vun wegen vegan un so.
Na, fraag ik em jo, wat dat in de Zeitung nu verkehrt stahn hett vun wegen vegan, oder wat he sik eenfach mal beten gahn lett, wo mal to Stadt is, do seggt he mi, dat ik em verwesseln mutt, he weer gor nich Arnold Schwarzenegger.
Man is jo ok kloor, hett so'n Minsch ok nich ümmer Lust, egaalweg vun siene Fans ansnackt warrn. Heff em denn jo ok in Roh laten. Hett he sik dat letzte Sück Schaschlik rinsteken un is denn röver na de anner Plattfoorm, wo de Tweeunföfftig na Flintbek rutföhrt.
Sä ik denn to den Imbissmann, ik segg, weetst egentlich wokeen dat ween is? Dat weer Arnold Schwarzenegger un egentlich is de vegan. Un dat harr ik mi al dacht - de Imbissmann wüss dor noch gor nix vun.

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch