Mit Jack un Büx

"Mit Jack un Büx"
Nu in Sommer geiht dat Heiraten jo wedder los. Un ik bruuk een Antogg üm heel dörch de Saison to kamen. Bither heff ik ümmer mien Kledaasch vun de Abi-Ball nahmen. Ik pass dor noch rinn, ümmerhen! Aver: dat is de Antogg, de ik in de letzten Johren op wirkli jede Fier an harr. Offizielle Empfang, 80te Geburdsdag, Schoolball vun de Geschwister, oder as ik an Rummelpott James Bond ween wull. Nichmol dat Hemd oder de Schlips heff ik wesselt!

Un bevör dat nu groot opfallt, söök ik mi eenfach gau wat nieges ut. Eenfach un gau. Denk ik. So is de Plaan. Eenfach gau wat utsöken.
So stah ik in de Stadt - vör so’n richtige Antoggladen. Inklusive Beratung un inklusive bang dorför ween. Bang dorför, dat ik al weet, wat ik hebben will: een schlichte dunkle Antogg - un dat ik wat ganz anneres kriegen warr. Wiel man dat hüüt so driggt. Un wiel mien Willen nich starkt nogg is gegenöver de Verköper un Berader.

Vörsichtig kiek ik dörch dat Schaufinster. Un seh se al: De Schnörkel-Westen de mi glieks andreiht warrn, bunte Schlipse, de se an mi utprobeern wött. Ik stell mi dat vör, wie ik segg, ik mügg een eenfarvige Schlips - un denn seggen se to mi: ach, dat is doch langwielig! Un ik denk: ja! Jüst dorüm will ik dat jo hebben. Een Antogg sall nich ulkig, fetzig oder sowat utsehn! Een Antogg is een Uniform, een Uniform op dat Schlachtfeld vun de Partykompanie. Un dor will ik de letzte ween, de mit een freche Schlipsmuster oder een afdreihte Hemd opfallt! Ik will mit mien Antogg verschwinnen, mi inordnen in de Dresscode vun de Festsellschapp.

Nu heff ik de Klink vun de Ladendör in Hand - un seh wi mi de Verköper dorbi süht. De maakt mi op und begrööt mi mit: "För se finnen wi eenfach un gau wat feines. Ik finn jo uk, to se passt uk … so'n witzige Hoot!" Een Zugg Schachmatt! Ik dreih ik üm, renn ruut un verstick mi achter de neegste Muur. Dormit harr ik nich rekent! Dat weer to veel!! Ik bün schweetig und dörch. Ohne Antogg, aver fertig - mit Jack un Büx!

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch