Kaken is langwielig

Kochshows im Fernsehen sind in Mode, haben viele Fans. Thomas Lenz Unterhaltungsgeschmack treffen sie allerdings so gar nicht.

"Kaken is langwielig"
Gifft Utsagen, mit de katapulterst du di automatsch in't Adsied! Bispeel: Kaken is langwielig! Wat hett mi nülich en Bagasch vun Frünnen scheef ankeken, as ik dat seggen ded. Wi weern inladt, hebbt setten un sapen un Kiekschapp keken, un dor lööp: mal wedder nix, för mi. Man för de annern: en Kakshow, wo hibbelig-halwgore Hobbykoekschen, mal he, mal se, op Düwel kam rut pürert, blanschert un balsamert, transchert, marinert un gratinert, wat en Bregen, de vör de Kamera will, sik blots utklamüstern kann: kanderte Kabeljaukiemen an Kokoskatüffel op Kerbel-Knoblauch-Krem un Gurkengaspatscho mit Garnelengnotschis an Grillgemüs-Gratäng.

Nix, wat jichtenswann jichtenseen nakaken würr. Viellicht dorüm kiekt sik de Lüüd sowat an, wiel se dat in't richtige Leven op'n realen Töller nie to sehn kriegt? För mi dorgägen is bi tokieken, woans een mit bruddelige Pött un bluwerige Pann hantert, so interessant, as Farw bi't drögen to bekieken. Kaken is langwielig!

Wenn öwerhaupt, will ik dat eten un nich maken un al gor nich weten, wat dor allens rinmanövrert ward. En Auto will ik je ok blots föhrn, un nich tosamenbugen! Un öwerhaupt: Wokeen garantert mi, dat mien egen Pizza beter ward, as de köffte Deepköhlpizza? Bi Oma hett je ok nich allens beter smeckt: Mal is de Soß anbrennt, mal weern dor Knaken un Greten, wo'n mit Knaken un Greten nich reken deit.

Dat pessert di mit Fardiggerichte nich! Ik meen, sülwst makt-backt-kakt is schön un good, man smecken moet dat ok! Öwer ik segg dat nich mehr so luud, ok dat Kaken langwielig is, nich mehr, wenn de verkiehrten Lüüd dorbi sünd. Sünst katapulter ik mi noch in't gesellschapplich Nirvana. Also: Pscht!

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch