De verkehrte Dag

Familie Spiekermann plant auf ihrer Amerikareise einen Abstecher nach Washington DC, aber erstmal muss sie überhaupt dorthin kommen.

"De verkehrte Dag"
Hi guys un Moin, Moin ut Washington. Jo, wi sünd nu in de Hauptstadt - doch dat blots so even un even. Dat keem so: as wi up den Floghoven von Chicago ankemen un no Washington inchecken wullen - wat weer passeert? Up use Tickets stund dat verkehrte Datum! Um 14 Daag vörut. Also, dat kann ja woll nich angohn! Ick foors no so'n nette Fro hen, de een Schild Linda/United Airlines up ehr Jack harr. Ick sä, Linda, hier, 'wrong date', verkehrtes Datum, wi willt vondogen flegen, today, nich in 14 Daag.

Se bleev ganz ruhig: I see. Hier bi den Serviceschalter anstellen. Hier ward Se hulpen. Okay. 12 Lüüd vör us in de Slang. Dat duurt ja een Ewigkeit. Een verkehrt Datum, wo kann sowat denn passeern? Mien Fro versteiht de Welt nich mehr. Dat kümmt blots von de lütten Tohlen un Bookstoven up dat Handy. Quatsch, seggt mien Fro, du hest nich uppasst. Ick heff nich uppasst? Nu pass du mol up … Doch nu sünd wi an de Reeg. Kristin/United Airlines Service winkt us ran. Can I help you? Klor kann se - un se helpt us. Se smitt ehrn Computer an, tippt un telefoneert, tippt wedder - un no 10 Minuten froogt se: Ick heff een Fleger no Washington, overs een Stunn loter, okay? Overs sowat von okay. Mann, wat för een Upregen.

As wi denn endlich usen boarding pass in de Hand hefft, kann ick blots noch seggen: Kristin, you are great! Du büst grootaartig! Och, seggt se, wenn dat nich socke Sloopmützen as di geev, denn weer ick doch arbeitslos. Bye! Ja, Bye, bit to't neegste Malöör.

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch