Dat düütsche Huus

Gerd Spiekermann berichtet von seiner neuesten Entdeckung im Urlaub, in New Orleans und lernt neue Freunde kennen.

Hi guys oder Moin, Moin ut New Orleans. Wat ick nu vertellen do, dat hett sick wohrhaftig so afspeelt. Pass op: Wi koomt ut den grode City Park un willt retour no de Strotenbahn, doch de Ampel steiht op root. Een Radfohrer höllt gegen us still. Un wat hett de Mann vörn op sien Lenker: een lütte swatte Pirotenflagg. Ick segg to mien Fro: Kiek mol, St. Pauli. Un de Mann seggt: Sünd Ji ut Hamborg? Ja. Nee! Doch! Ick koom ut Bochum. Wat förˋn Hallo. Weet Ji egens, dat dat hier um de Eck een Düütsch Huus geven deit? Nee! Doch! Mööt Ji sehn hebben. Kort un goot: twee Doog loter sünd wi dor henmarscheert un droopt Düütsche, echte un nogemookte. Dor is Hans ut Bremen, de siet knapp 20 Johr hier leevt un sick freit, dat Werder wedder opstegen is. Denn is dor Götz ut Braunschweig, een Wolfgang-Borchert-Spezialist, de 1957 mit sien Familie utwannert is un ook Casey lehrt wi kennen, de sick sülvst ˋAmerirolerˋ nömen deit, een Amerikoner, den sien Vörfohrn ut Tirol kemen. Un nich to vergeten Brad, de Craft-Beer no düütsch Vörbild opˋn Markt bringen will. Wi dröövt al mol vörkosten. Cheers! Prost!
Dat Düütsche Huus is natürlich dekoreert mit allerlei düütschen Kroom: Beerhumpen, Flaggen un een Plakaat vonˋt Oktoberfest. Dat Smuckstück overs is een dubbelte Klock, de de Tiet von New Orleans un Berlin wiesen deit. Un as wi denn gegen halv ölben so sinnig den Ovend utklingen laten wullen, dor seh ick, dat Ji hier tohuus al wedder opstohn mööt. Wenn di dat klor ward, denn mookt dat Verreisen dubbelt Spooß. Nee? Doch! Bye, bit toˋn neegsten Mol.

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html