De Hochtiedsreis

Es gibt Ereignisse, die Familiengeschichte schreiben. Und Matthias Stührwoldt denkt da ganz konkret an die Hochzeitsreise seiner Eltern zurück.

Mien Öllern hebbt in ehr Leven nich veel Urlaub mokt. Se hebbt dat ok blots selten mol versöcht. Jichtenswie weren se ümmer de Meenung, se kunnen den Hoff un de Dierten nich alleen laten. In de 36 Johren, de se den Hoff mokt hebbt, weren se villich dree Wochen nich int Huus, hebbt also villich 21 Nächte nich in ehr eegen Bett schlopen. Dat is eene Quote vun 0,58Periode3 Daag int Johr frie.
Aver se hebbt eene Hochtietsreis mokt. In de Johren vör de Hochtiet hett Mudder ümmer över Sommer in de Schweiz arbeit, in Zürich, merden in de Grootstadt, in een Pension mit Cafe dorbi. Jedet Johr, vör se wedder nah Huus föhr, hett se versproken: Anner Johr koom ik wedder. So ok 1961.
Aver denn bleev erst ehr Vadder doot, un een poor Daag later hett Mudder sik mit mien Vadder verlöövt. In Mai 1962 hebbt se heirat, un Mudder hett mit Vadder den Hoff anpackt. Nu kunn se aver nich nah Zürich, obgliek se dat toseggt harr. Man ehr lütte Schwester Rosi weer jüst fardig mit de Utbildung un harr Tiet. Schrieven oder telefoneeren weer Mudders Saak nich, also hebbt Vadder un Mudder, as dat Tiet weer, Rosi in Vadders olen Mercedes packt un sünd mit ehr nah Zürich föhrt. Weil se aver eene Panne harrn, hebbt se dat nich an een Dag schafft. Se weren jung un harrn wenig Geld. Schlopen hebbt se all dree int Auto, op den Parkplatz vun eene groote Kirch in Karlsruhe. Nächsten Morgen sünd se wieter föhrt, bit nah Zürich. All dree rin in de Pension, moin Cheff, ik kann düt Johr nich to arbeiten kommen, ik bün verheirat. Dat is mien Mann Hannes; wi mütt morgen avend wedder melken. Un dat hier is mien lütte Schwester Rosi. De kann evenso goot arbeiten as ik. So, wi mütt los. Tüüs!

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch