Wi snackt platt

Theater op Platt, dat geföhlte Öller un Vertell doch mal

Sonntag, 23. März 2025, 08:30 bis 09:00 Uhr

Veel Publikum in de Marschnerstraat wünscht sik (vun links): Michael Niesta, Speelbaas Carsten Hinz, Alex Pensel un Christina Wagner

De een oder anner vun jo warrt sik woll noch op besinnen op den Hollywood-Klassiker "Die Katze auf dem heißen Blechdach" mit Liz Taylor un Paul Newman. Grundlaag för düssen Film weer en Theaterstück vun Tennessee Williams un dat gifft dat ok op Platt, översett vun Frank Grupe ünner den Titel "Slagsiet". Vör'n poor Johr geev dat dat al mal in't Ohnsorg-Theater to sehn, un nu waagt sik dor ok en Amateurbühn ran an düt Stück: De "DSV Hamburg" in dat Theater an'e Marschnerstraat. Dor gifft dat dat Drama "Slagsiet" Enn vun'n Maand an dree Daag to sehn – vun'n 28. bet 30. Mart. Bernhard Koch hett sik dat vöraf al mal'n beten wat ankeken, dat köönt ji Sünndag denn bi "Wi snackt Platt" hören.

Vertell doch mal 2025

In'n Junimaand is dat sowiet, dor finnt an'n 22. denn wedder de grote Afsluss-Gala in't Ohnsorg-Theater vun "Vertell doch mal" uns plattdüütsche Schrievakschoon statt. Bet dorhen weet wi denn ok, wokeen wunnen hett. Noch sünd wi bi de Utwahl. Över 600 Lüüd hebbt düt Johr wedder mitmaakt un uns jümehr Geschicht schickt. Över de eerste Jurysitten vertellt Frank Jakobs Sünndag denn bi "Wi snackt Platt" mehr.

Bavento is Benita Brunnert för uns noch in Noordersteed ween un hett dor de Lüüd bi Tanks Theater in'n Festsaal an'n Falkenbarg besöcht. Af 27. Mart speelt se dor dat Stück "Duppelt Glück". Un denn kriegt ji bi "Wi snackt Platt" noch en Geschicht vun Reimer Bull op'e Ohren. Dat allens un noch’n beten wat mehr gifft dat Sünndag, 23. Mart to hören - morgens halvig negen bi NDR 90,3.

Moderatschoon: Jürgen Fitschen

De Leder in uns Sennen:

Rollin Home – Lui & Fiete
In disse Tied – Gerrit Hoss
Dörp Reggae – Ina Müller
Wat is – Yared un de Schlickrutscher
In de Provinz – Timsen tohoop mit Ringlstetter

Weitere Informationen