Wi snackt platt
Sonntag, 11. Juni 2023, 08:30 bis
09:00 Uhr
Bi "Wi snackt Platt" geiht dat dütmal, blangen anner Saken, üm den plattdüütschen Lesewettstriet „Jungs un Deerns leest Platt“. Dat geiht an'e See to'n "Schiffsansagedienst Cuxhaven" - un wi stellt Jo uns Plattdüütsch Höörspeel "Wilma un Karl" vör.
"Jungs un Deerns leest Platt": Endrunn-Gala bi Ohnsorgs
„Jungs un Deerns leest Platt“. So heet en Wettbewarv, den dat all twee Johr hier bi uns in’e Stadt geven deit. Schölersche und Schölers ut Hamborg leest dor Geschichten op Plattdüütsch vör. Üm un bi hunnert Junge Lüüd ut ünnerscheedlich Hamborger Scholen hebbt dütmal bi den Vörutscheed vun "Jungs un Deerns leest Platt" mitmaakt. Nu sünd de besten vun jüm an'n Sünndag, den 18. Juni, üm Klock 11 in't Ohnsorg-Theater to beleven. Vörlesen warrt de jungen Lüüd plattdüütsche Geschichten vun Autorinnen un Autoren, de hier bi uns ut den Noorden kaamt. Geschichten to'n Högen un Smustergrienen sünd dorbi, man ok ernste Texten. Modereern warrt de Veranstalten Sandra Keck - un singen warrt se ok: tohoop mit Schauspelersche und Schauspelers vun't Ohnsorg-Theater gifft dat Pop-Songs op Platt to höörn. För "Wi snackt Platt" hebbt wi uns mit Thomas Bressau vun de Hamborger Schoolbehöörd ünnerhalen. He is tostännig för all de Wettbewarven, de dat an'e Hamborger Scholen so geven doot. Un een lütten Vörgesmack op de "Jungs un Deerns leest Platt"-Gala in't Ohnsorg-Theater gifft dat ok: wi hebbt för Jo de "Geschicht vun't gröne Fohrrad" rutsöcht, de Philip Hintz bi'n letzten Wettstriet in't Johr 2021 vördragen hett.
Henwies: De "Jungs un Deerns leest Platt"-Gala is an'n Sünndag, den 18. Juni in't Ohnsorg-Theater. Vörmiddags, Klock 11 geiht dat los - un dat Beste is: kössen deit dat Ganze nix. Ji köönt dor eenfach vörbigahn un tokieken.
Tipp för en Utfloog: De "Schiffsansagedienst Cuxhaven"
Villicht hebbt Ji jo ok mal wedder Lust, en lütten Utfloog hen na de See to maken, to’n Bispeel na Cuxhaven! All de vun Jo, de al mal dor weern, villicht ok för en Sommerurlaub, de weet: Cuxhaven, dat bedüüdt toeerst mal Noordsee, Badestrand un Wattlopen. Wat een dor aver ok besünners goot kann, dat is „Schiffe kucken!“. Denn wenn dor in Cuxhaven de dicken Pötte vörbitrecken doot, denn maakt nich blots de Touris ut Bayern un Berlin grote Ogen, dat is ok för uns Noorddüütschen heel interessant. „Wat is dat denn för een Schipp?“ höört een de Lüüd denn faken fragen. Un de Antwoort dorop, de kriggt een bi’n „Schiffsansagedienst Cuxhaven“ – dat is so en beten wat as dat Willkommhöft hier bi uns in Wedel. Bernhard Koch, de weer annerletzt mal dor un hett de flietigen Ehrenamtlichen vun’n Schiffsansagedienst besöcht.
Plattdüütsch Hörspeel: Wilma un Karl
An'n Middewekenavend, dor is mal wedder Tiet för uns Plattdüütsch Hörspeel. “Wilma un Karl” so heet dat Stück dat Ji dütmal höört. Dat is de Geschicht vun een Fro un ehrn Kerl. De Twee sünd lange Tieden tohoop dör’t Leven gahn bet dat Schicksal toslaan hett... Bi "Wi snackt Platt" vertellt Jo Ilka Brüggemann mehr över dat Stück.
Moderatschoon: Jan Wulf
Schlagwörter zu diesem Artikel
Plattdeutsch
