Wi snackt Platt: Ne'e Wöör för den Sass, Vertell doch mal un ne'e Musik

De Bunnsraat för Nedderdüütsch will den Spraakutbo för de Plattdüütsche Spraak vöranbringen un ok de Redakschoon vun dat plattdüütsche Online-Wöörbook "De ne'e SASS" diskereert flietig över ne'e Wöör, de nu mehr un mehr ok ehrn Weg in dat Wöörbook finnen doot. Bi Instagram warrt düsse Wöör künnig maakt - un mitdiskereen, wat een düsse Wöör goot oder nich so goot finnen deit, kann een dor ok. Ok via Email (sass-redaktion@gmx.de) kann een mit de Redakschoon in Kuntakt kamen un, kloor, ok Vörslääg maken, welke Wöör noch in den SASS mit rin schüllt. Wi hebbt mit Marianne Ehlers ut de SASS-Redakschoon snackt: doröver, woans de ne'e Online-SASS annahmen warrt un ok över de ne'en Wöör, de nu in dat Wöörbook mit rinkaamt. Bavento gifft dat in düsse Utgaav ok noch en Utblick dorop, woans dat nu bi uns plattdüütsche Schrievakschoon "Vertell doch mal" wiedergeiht, wi vertellt Jo mehr över uns Plattdüütsch Höörspeel "De eerste Liek" vun Hugo Rendler, Gerd Spiekermann is mit en "Hör mal'n beten to"-Klassiker över "Gurken" to höörn - un ne'e plattdüütsche Musik vun Timsen un Johnny Ubben hebbt wi ok noch för Jo.

Moderatschoon: Jan Wulf