Wi snackt platt

De Trinitatis-Chor Altnaa gifft an'n tokamen Sünndag en Kunzert in de Petri-Kark in de Schillerstraat. Namiddags, Klock fief, geiht dat los. De Intritt köst 14 Euro für wussen Lüüd, Kinner betahlt 8 Euro.

Dütmal geiht dat bi "Wi snackt Platt" üm den Trinitatis-Chor Altona, de an'n 8. Oktober sien Johrskonzert in de St. Petri-Kark in de Schillerstraat geven deit. In Oogenblick, dor sünd de Chorlüüd natüürlich düchtig veel an’t Öven, un Bernhard Koch, de weer annerletzt mal bi en Proov dorbi un stellt Jo den Chor vör.

Tokamen Sünnavend is de Ohnsorg-Kummedie "De leven Öllern" live in't NDR Fernsehen to beleven. Avends üm Viddel na acht geiht de Vörhang op.

Dorto geiht dat bi "Wi snackt Platt" ok noch üm de Sängersch Norma, de an’n Maandag, den tweten Oktober, vörmiddags üm 11.15h  op de NDR-Bühn bi’t grote Fest to'n Dag vun'e Düütsche Eenheit hier bi uns in Hamborg to beleven is. Un dat geiht üm en ganz besünnere Theater-Vörstellen in't Ohnsorg-Theater. Tokamen Sünnavend is dor dat Stück "De leven Öllern" to beleven un dat Beste is: de NDR deit de Vörstellen mit siene Kameras live in't NDR Fernsehen överdregen. Ji köönt Jo also tohuus bi Saltstangen un Cola en richtig schöön kommodigen Avend maken un en bannig lustiget Stück op Platt un Missinsch geneten. Bi "Wi snackt Platt" maakt wi Jo en beten wat Lust op dat Stück "De leven Öllern" - un dat gifft ok wat to winnen: denn mit en beten Glück köönt Ji ok mit in't Ohnsorg-Theaterdorbi ween, wenn de rode Vörhang op geiht. 2 x 2 Korten för de Vörstellen hebbt wi för Jo. Wat Ji dorför doon mööt? An'n Sünndagmorgen "Wi snackt Platt" op NDR 90,3 höörn! Klock 8.30 geiht dat los!

Moderatschoon: Jan Wulf

Weitere Informationen

Plattdüütsch op'e Ohren! De "Wi snackt Platt"-Podcast

Wat an plattdüütsche Kultur op de Bühn, in de Literatur oder in Films löppt - Ji kriegt dat mit bi "Wi snackt Platt" vun NDR 90,3. mehr