Wi snackt platt

Mang all de Wiehnachtssteerns: Dirk Meyer

Bi „Wi snackt Platt“ stellt wi Jo ja ümmer mal wedder plattdüütsche Lüüd vör un de ehren Arbeitsalldag. Dütmal sünd wi süden vun Hamborg ünnerwegens un kiekt dor Dirk Meyer 'n beten wat över de Schuller. He arbeidt in dat gröttste Goorncenter, wat dat mit Dack över in Düütschland geven deit. Bernhard Koch hett dor annerletzt mal bi em vörbikeken un vertellt uns dorvun.

En Snieder mit Knööv

Plattdüütsch kann een nich blots hören, dat kann een sik ok ankieken: Tokamen Sünnavend - an'n 21. Dezember middags Klock twölf - löppt in't NDR Fernsehen "Das tapfere Schneiderlein" un dat op Platt. Bi "Wi snackt Platt" maakt wi Jo al mal'n beten wat neeschierig dorop. Un vöraf - ok an'n 21. Dezember, dor aver halvig twölf - gifft dat bavento denn noch en ne'e Utgaav vun "De Noorden op Platt" to sehn. Un dor sünd wi dütmal blangen anner Saken ok op Finkwarder to Gang bi Bäckermeister Jan Körner. Mit em tohoop gaht wi so'n beten wat dat Geheemnis vun den Brunen Koken op'n Grund. So as dat heten deit, is dat Traditschoonsgebäck dat eerste Mal 1782 in en Backstuuv in Altna backt woorn. Bi "Wi snackt Platt" warrt Jan Körner vöraf ok al'n beten wat vertellen.

Platt Schnack Mucke mit Yared

Un denn wüllt wi Jo ok noch mal'n beten wat neeschierig maken op Yared Dibaba siene Sennen "Platt Schnack Mucke", denn de is ok as Podcast in de ARD Audiothek to finnen, so dat een sik de jedertiet anhören kann. Dat Ganze is ümmer en bunten Snack mit intressante Lüüd, de dor to Woort kamen doot – vun Matthias Stührwoldt över Detlef Wutschik bet hen na Gerd Spiekermann.

Dat allens - un noch'n beten wat mehr - dat gifft dat bi "Wi snackt Platt" an'n Sünndag, 15. Dezember to hören - morgens halvig negen bi NDR 90,3.

Moderatschoon: Jürgen Fitschen

De Leder in uns Sennen:

Charmonia - Help
Wiebke Colmorgen & Hardy Kayser – Maak ik morgen
Rolf Zuckowski & De Finkwarder Speeldeel – Wiehnacht wat büst du
Otto Groote Ensemble – Min Jehann
Godewind – Wind vun achtern

Weitere Informationen

Platt op'e Ohren: De "Wi snackt Platt"-Podcast

Wat an plattdüütsche Kultur op de Bühn, in de Literatur oder in Films löppt - Ji kriegt dat mit bi "Wi snackt Platt" vun NDR 90,3. mehr

Wi snackt Platt bei NDR 90,3

"Wi snackt Platt" bringt de heemliche Mudderspraak vun uns Noorddüütschen ok in't Radio un in'n Podcast to'n Klingen. mehr

Wi snackt Platt: Dat Speel mit uns Spraak

Bi "Wi snackt Platt" speelt wi dütmal 'n beten wat mit uns plattdüütsche Spraak. Un woans kunn dat beter gahn as op en Poetry Slam. mehr

Wi snackt Platt: Snacks op Platt

Bi "Wi snackt Platt" geiht dat dütmal veel wat üm Snacks op Platt, de ok de Hoochdüütschen kennen un bruken doot. mehr