In Wandsbeek hett dat hüüt Morgen ornlich wat rummst, denn in en Mehrparteienhuus an de Ohrensborger Straat geev dat en Exploschoon. Dat Huus müss rüümt warrn. Un för all de Lüüd, de dor wahnen doot, hebbt se eerstmal en hvv-Bus praatstellt hatt. So as de Polizei dat seggen deit, is bi de ganze Saak aver nüms bi to Schaden kamen. In’t Parterr vun dat Huus is normalerwies en Pizzaladen binnen, man de is nu twei. Woso dat rummst hett, dat is noch unkloor. En Statiker schall sik dat Huus nu eerstmal ankieken.
Mehr Sekerheit un en Weertschop, de brummen deit. Dat weren för den Hamborger CDU-Böversten Dennis Thering bi den Bunnsparteidag güstern de Themen, de ganz bavenanstahn doot. De Christdemokraten hebbt sik blangen anner Saken för scharpere Regeln bi de Migratschoon utsnackt un ok dorför, de Stüern daaltosetten. Thering is de Topkandidat vun’e Hamborger CDU un sä to’n NDR, he stell fast, dat de Themen in’n Bund nu ok den Hamborger Wahlkamp överstrahlen deen.
China un de USA kriegt sik nu so bilütten in’e Kladden, denn twüschen de beiden groten Volksweertschopen drauht en Hannelskrieg. Denn nadem de USA Töll op Waren ut China ankünnigt hett, hebbt nu hüüt fröh de Böversten in Peking Gegentöll künnigmaakt. Un düsse schüllt denn af tokamen Week gellen. Man op’e annern Siet fallt op Waren ut Kanada un Mexiko nu aver eerstmal keen US-Töll mehr an. Denn düsse beiden Länner wüllt dorför nu denn eerstmal gegen den Drogensmuggel ne ganze Eck wat forscher gegenahngahn.
De sonöömte Schaddenflott vun Russland bi de Scheep warrt blangen anner Saken för mehre Schadens an Kavels in’e Oostsee de Schuld geven. So as dat utsüht, hebbt woll ok düütsche Redereen Scheep na düsse Schaddenflott hen verköfft un dormit denn ok veel Geld verdeent. Dat wiest Recherchen, bi de ok de NDR, WDR un de Süüddüütsche Zeitung mit bi ween sünd. Dorna to uurdelen, dreegt de faken rotten Tankers dorto bi, Sankschonen gegen dat Öl ut Russland to ümgahn. De Scheep gellt as Risiko för de Ümwelt un kunnen ok för Spionaag un Sabotaag bruukt warrn.
Bald staht se denn ümmer mal wedder in’e Klassenrüüm: Üm un bi 470 Nawassschoolmesters leggt nu in Hamborg mit jümehr Referendariaat los. Maken mullen dat egens meist dubbelt so veel. Un op’t leevst wullen de mehrsten vun jüm, so as in de Vörjohren ok al, na’t Gymnasium hen. Un üm un bi Dreeviddel vun de ne’en Schoolmeesters sünd Froenslüüd.
Güstern Avend is bi en Insatzfohrt in Horborg en Peterwagen to Malöör kamen. Een vun de Lüüd vun’e Polizei is dorbi licht wat bi to Schaden kamen, as se op de Winsener Straat op’e Eck Reesebarg gegen en Gadder an’n Fohrbahnrand rumsen deen. De Beamten weren jüst op’n Weg na en Spoortsbar hen, wo sik woll mehre Lüüd in’e Kladden harrn. As de Polizei dor an’n Enn denn ankamen is, hebbt se noch gegen welk vun de Lüüd Platzverwiesen utsnackt hatt.
Sünn un Wulken wesselt sik vundaag so’n beten wat af. Meisttiets blifft dat överall dröög bi Temperaturen vun üm un bi veer Graad. Opstunns sünd dat noch minus dree Graad in Wellingsbüddel. De Utsichten: Morgen fröh regent dat eerstmal ’n beten wat. Later blifft dat denn meisttiets dröög. Un de Sünn kummt denn ok’n beten wat rut bi Temperaturen vun bet to söven Graad.
