Veer Benen, Steckdösennöös un berühmt ut Literatur, Film, Fernsehen und de Musik. Dat Swien. Man meestieden hett dat Swien een slechten Stand. Gifft so en Spreekwoord. Hum geiht dat as en Swien. Van de waard erst wat goods seggt, wenn he dood is. Tja. Man to Leevtieden is dat en Dreckswien of en Swienegel also en Saukerl, Swienpuckel gifft dat ok un wenn dat eten nich smaken deit, denn is dat Swienfoor. Aber waarum steiht dat Swien so slecht daar?
Wiel sük dat Deer in Mudder, in Schlamm weltern deit, immer fuul is. Dat kann ja nix Goods wesen. Ruugweg en Viddel van de Minsken up d' Welt düren keen Swienflesk eten, wiel hör dat hör Religion verbeden deit. Man nich immer is dat Swien ok slecht. Denn dat gifft ja ok dat Glücksswien, of wenn een wat wunnen hett, denn hett man Swien hat. Waarum dat so is, is nich ganz klaar. Sall mit en Kartenspill tosamenhangen, waar de hoogste Kaard ok as Sau betekend waard. Kann aber ok daarvan kamen, dat dat de Lüü in mall Tieden fröher noch eenigermaten good gung, de noch en Swien harren.
Man de Schimpwoorden sünt doch mehr as de mooi Woorden. Wat egentlich nich recht is. Denn Swienen weltern sük in Mudder, um sük oftoköhlen un daarmit se keen Sünnenbrand kriegen. Un se sünt ok schlau, so as Apen mehr of minner, hebben Forskers rutfunnen. Dat wiest, nich all, wat mall utsücht is slecht. Man so mennig Saak, de boven bunt is, is daartegen unnern Strunt. Un well sük daar over wunnern deit, de lööft sien Schwien fleit.
Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html
Die Welt snackt Platt: Alles rund um das Thema Plattdeutsch:
https://www.ndr.de/plattdeutsch