En ölven Johr olen Intensivdäder ut de Füerbargstraat is al wedder utneiht. Siet güstern Meddag söökt se in Hamborg wedder na dat Kind. De Jung is de Behöörden al mehr as 100 Mal utwittscht. De Seriendeev weer woll dat letzt Mal in de Jugendpsychiatrie vun't UKE, un sull nu na den Kinner- und Jugend Nootdeenst na de Füerbargstraat torüch. Egens sull de Ölvenjohrige siet twee Weken in en slaten Inrichten ünnerbröcht ween, de dat so in de Oort in Hamborg gor nich geven deit.
Un denn gifft dat vundaag ok noch en Demo-Rave gegen dat Starven vun Clubs. Vunaf Klock dree sett sik de Tog in de Höögde vun de Lannensbrüchen in Gang un treckt denn bet na'n Grönen Bunker hen. De Veranstalters reekt mit bet to 10.000 Lüüd.
In de Binnenstadt warrt dat vundaag bannig vull. Klock twee geiht an de Lannensbrüchen ein Protestmarsch vun de Haven-Mitarbeiders los. De Warkschop Verdi harr dorto opropen, wieldat se bang is, dat dor Steden streken warrt. Dat hett dormit to doon, dat en Deel vun den Havenbedriever HHLA an de Reederee MSC verköfft warrn sall.
Un denn gifft dat vundaag ok noch en Demo-Rave gegen dat Starven vun Clubs. Vunaf Klock dree sett sik de Tog in de Höögde vun de Lannensbrüchen in Gang un treckt denn bet na'n Grönen Bunker hen. De Veranstalters reekt mit bet to 10.000 Lüüd.
De Geschicht nimmt eenfach keen Enn. Dat ole Kohlekraftwark Wedel blifft noch länger an't Nett as dat mal plaant weer. De Bo vun den ne'en Energiepark Haven treckt sik noch rut. Dat hebbt de Hamborger Energiewarken op en Nafraag vun de Düütsche Presse Agentur künnig maakt. Dorüm warrt dat Kohlekraftwark Wedel ok över dat Johr 2025 noch för dat Versorgen vun de Stadt mit Fernwarms bruukt. Eerst na de Tiet vun't Inböten in't Fröhjohr 2026 sall dat nu in den so nöömten Reserve-Bedriev gahn.
Dat eerste Mal, sietdem in Afghanistan de Taliban de Macht övernahmen hebbt, hett de Bunnsregeren nu afghan‘sche Straafdäders dorhen ok afschaven. En Saak, de Bunnsbinnenministersch Nancy Faeser richtig finnen deit. In't ZDF sä se, dat is en düütlich Teken för dat Dörchsetten vun en Rechtsstaat. Wat Faeser sä, warrt blots afschaven, wenn een weet, dat de Lüüd, de dor henkaamt nich de Dood drohen deit.
Eerst Opstieger, nu Slusslicht. De FC St. Pauli harr ok bi sien twetet Speel in de Football-Bunnsliga dat Nasehn. Un dat bi Union Berlin mit en 0 to 1. Vunmeddag speelt Preussen Münster in de twete Liga bi'n HSV.
Dat Verleger-Ehpoor Gesche un Peer-Marten Scheller warrt vundaag mit den renommeerten Quickborn-Pries vun de Hamborger Quickborn-Vereenigen utteekt. Den Pries gifft dat al siet 1962. All twee Johr geiht he an Lüüd, de sik op ganz besünner Oort un Wies üm de plattdüütsche Spraak un Literatur verdeent maakt hebbt. Mit jemehrn Quickborn-Verlag hebbt sik Gesche un Peer-Marten Scheller heel un deel op plattdüütsche Literatur spezialiseert.
Vundaag hett de Süün twoors beten wat länger Deenst, liekers seht wi ok poor Wulken an’n Heven bi bet to 23 Graad un mauen Wind ut Noord bet Noordoost.
Morgen warrt dat denn al wedder en Stück warmer bi bet to 25 Graad. Dat geiht natürlich blots, wenn uns de Sünn wedder angrienen deit. Man dorför warrt de Wind ut Oost ok mal wat frischer.
