Rassistische Parolen to Musik vun Partyhits singen is en Trend in Online-Nettwarken. Dat hett dat Hamborger Hans-Bredow-Institut in't NDR Hamborg Journal seggt. Totiet is de Staatsschutz an't Ermiddeln, un dat geiht fief Maal üm Lüüd, de in Hamborg to "L'Amour toujours“ utlännerfiendliche Parolen sungen un dorto den Hitler-Groot wiest hebben schüllt. De Minschen, de sowat vörsmeten warrt, de hebbt sik deelwies sülvst dorbi filmt un denn dat Video in't Nett rinstellt.
Hamborg will noch vör de Sommerpaus fastleggen, wo veel Grundstüer Hamborger Egendömers in Tokunft betahlen schüllt. All de Stüerbeschede tosamentellt schallt dat akraat jüst so veel inbringen as in't lopen Johr, sä de Finanzsenater Andreas Dressel, un dat schall bummelig 510 Millionen Euro inbringen. Blots de Lasten, de warrt nu anners opdeelt.
Noch vör de Sommerpaus schall de Börgerschop ok över den MSC-Deal afstimmen. Mit dat plaante Instiegen bi den Haven-Bedriever HHLA will sik tovör aver nochmal de Huusholts-Utschuss befaten. De Schwiezer Reederee MSC bringt al vörher mehr Ladung na Hamborg hen un nimmt den Haven vunaf Juni tosätzlich in en Liniendeenst twüschen Asien un Noordeuropa mit rin. Affardigen laat se de Frachters denn aver bi den HHLA-Konkurrent Eurogate.
De UN-Sekerheitsraat warrt womööglich hüüt över noch een Resolutschoon to'n Gaza-Krieg afstimmen. De Vörlaag to'n Besluten verlangt en Stopp vun de israeelsche Offensive in Rafah un dat de Wapens eerstmal swiegen schüllt. Un denn schall ok noch de Terrorgrupp Hamas de restlichen Geiseln free laten. Verfaat worrn is de Text vun Algerien - dat Land is in'n Sekerheitsraat Vertreder vun de araabschen Staten.
Den HVV siene Internetsieden sünd vun Hackers angrepen worrn. So hett dat en HVV-Sprekersch seggt. Op de Website kunn längere Tiet nich togrepen warrn, un ok vunmorgen leep noch nich allens wedder ganz normaal. As dat betto utsüht, sünd dor aver keen Kunnendaten bi wegkamen. Wokeen achter dat Angriepen steken doot, dat lett sik nich seggen.
Wo wichtig de Presse is, dat hett Hamborgs Börgermeester Peter Tschentscher güstern ünnerstreken - un ganz besünners in so en Johr mit Wahlen, de för Düütschland, Europa un de USA den Kurs för den neegsten Johren afsteken doot. Bi den "Hamborger Mediendialog" hebbt mehrere Fachlüüd in't Raathuus doröver diskuteert. Besünners bi de jungen Lüüd schall de Medienkompetenz stärkt warrn. Dat verlangt de Initiative "Use the news", de bi den Mediendialog mitmaakt hett.
De Dag bringt dicke Wulken un wenig Sünn. Jümmer wedder mellt sik de Regen, ok mal mit Blitz un Dunner – bi blots noch 18Graad. Nu sünd dat an de Bill 14Graad. Morgen gifft dat mehr Wulken as Sünn un blots noch denn un wenn mal Regenschuern – bi bet to 20 Graad.