Woans geiht dat hier bi uns in Hamborg wieder mit den Elvtower? Op düsse Fraag geev dat güstern in’n Huushooltsutschuss vun’e Börgerschop Antwoorden. Hamborg hett för den Rohbo dat Recht anmellt, dat Grundstück trüchköpen to könen. Dorför hett de Stadt nu negen Maand lang Tiet. Stadtentwickelnssenatersch Karen Pein sä, dat düsse Schritt nödig ween is, wiel dat de Stadt bi dat Verkoopsverfohren, wat totiets lopen deit, nich mitsnacken dröff. Un blots so op düssen Weg kann Hamborg denn unpassliche Investoren verhinnern.
En Keerl stickt in en Regionaaltog na Hamborg hen twee anner Minschen daal. Dat is vör knapp annerthalf Johr bi Brooksteed passeert. Vundaag nu schall dat dat Uurdell in düssen Fall geven. De Anklaagte Ibrahim A. schall levenslang in’t Kaschott, so tominnst verlangt dat de Staatsafkaatschop. De Verdedigen op’e anner Siet hollt em för krank un verlangt, dat he na de Psychiatrie henkummt.
De Tahl vun’e Inwahners in Hamborg stiggt. Un dor stellt sik nu ok de Füerwehr in uns Stadt op in, denn ok de wasst. Denn bi de Füerwehr hebbt se in’e verleden Tiet hunnert Insatzlüüd bavento kregen, üm so denn ok op all Minschen in Hamborg oppassen to könen. Ok de Reddensleitsteed hett dreeuntwintig Arbeitslüüd mehr as noch twee Johr tovör. Wat ok grötter worrn is, dat is de Fuhrpark vun’e Füerwehr. Dor hebbt se blangen anner Saken för jümehr Insätz acht ne’e Autos kregen.
Nich blots op’e Füerwehr mutt een sik verlaten könen. Ne, dat schall ok för de Krankhüüs gellen. Un deswegen will dat Bunnskabinett vundaag de Krankenhuus-Refoorm op’n Weg bringen. Vör allen Dingen schüllt tokamen Tiet vele Krankenhüüs nich mehr allens anbeden, denn se schüllt sik op spezjelle Saken fastleggen. So schall denn, wat dat Finanzjelle angeiht, nich mehr so veel Druck op jüm lasten. Man Krankenhüüs, Dokterverbänn un Krankenkassen sünd Bang, dat de Lüüd so denn nu länger töven un dat de Versekerten mehr betahlen mööt.
Bi’n Basketball hebbt de Hamborg Towers wunnen. De Mannschop ut Ollenborg hett vun jüm mit 93 to 81 een op’e Mütz kregen. Un dat is för de Hamborgers ganz wichtig ween, denn so sünd se wiederhen in dat Rennen üm den letzten fre’en Platz bi de Playoffs, also dat Viddelfinaal, wo dat üm de düütsche Meisterschop gahn deit. Morgen speelt de Towers denn in Ludwigsborg.
Vundaag warrt dat richtig warm mit bet to sössuntwintig Graad. Opstunns sünd dat achtteihn Graad in Fuhlsbüddel. De Sünn schient düchtig – sössteihn Stünnen lang, mehr is totiets ok gor nich mööglich. Namiddags köönt denn aver ok ’n poor Wulken mit bi ween. Man de Wind frischt op. Stedenwies ok ’n beten wat duller, so dat dor denn ok mal ’n poor starke Böen mit bi ween köönt. Un morgen warrt dat Wedder meist jüst so schöön as vundaag, sünd blots ’n poor mehr Wulken un twee Stünnen weniger, wo wi de Sünn to sehn kriegt. Aver: De Temperaturen liegt ok morgen wedder bi bet to sössuntwintig Graad.
De Ampel-Koalitschon argert sik jümmer noch mit jümehrn Huushoolt rüm. Nu hett sik de Kanzler op de Siet vun Finanzminister Christian Lindner vun de FDP stellt. Lindner harr giern, dat all de Ministerien wat sport – en poor Ministerien harrn man geern mehr Geld. In't Interview mit'n "Stern" sä Olaf Scholz nu: Dat güng dorüm Wünsch un Realitäten tosamen to bringen. Zentraal weer bi'n Huushoolt ünner annern, dat de Weertschop wedder andreven warrt.
