Ok in Hamborg dröff Cannabis jo al en Johr lang anboot un smöökt warrn. Nu hett de Polizei mal jümehr Fäll, de wat mit Drogen to doon harrn, tosamentellt, un se hett faststellt, dat de Fäll üm en Drüttel sunken sünd. De Schandarms bekrittelt man, dat dat Kuntrulleren vun de ne'n Regeln recht swoor weer. In Hamborg gifft dat al acht Verenen, de Cannabis anboot un dat denn an jümehr Liddmaten rutgeven dröövt. Tolaten sünd föfftig Gramm per Maand.
Rabea Rogge ut Berlin is de eerste Fro ut Düütschland, de na'n Weltruum flagen is. Tosamen mit drei anner Astronauten weer se in de Nacht vun Cape Canaveral in'n US-Bunnsstaat Florida start: in en "Dragon"-Kapsel vun SpaceX. Nu schall de Crew veer Daag lang op en ne'e Ümloopbahn över de Polarregion flegen. Dorbi schall ünner annern dat Lüchten an'n Heven ünnersöcht warrn.
In de verleden Nacht sünd dat in Hamborg deelwies noch null Graad ween – un dat Winternootprogramm för Lüüd ohn Ünnerdack endt vundaag. Dat bekrittelt de Diakonie. Se verlangt: Dat müss mehr Wohnruum för de Lüüd geven. In de verleden Daag hefft noch üm un bi fiefhunnert Minschen Ünnerdack vun't Nootprogramm kregen. Bummelig söventig warrt man eerst mal noch nich rutsmeten, heet dat vun de Soziaalbehöörd: Se weren to krank för de Straat or hefft keen Recht op en Ünnerkunft vun de Stadt.
De Linksfraktschon will, dat dat in Hamborg in Tokunft nich mehr so veel Wahlplakaten geven schall. Se hett nu en Andrag in de Börgerschop stellt. Sülms lütte Straten weren in'n Wahlkamp veel to dull tokliestert worrn – un dat weer nich goot wegen Schuul vun de Ümwelt. De Linke hett ok en Vörslag maakt: In Tokunft schullen all de Parteien en Maximum an Plakaten hebben – afhangig dorvun, wo groot de Parteien sünd.
De Hamborger Füerwehr hett in Kirchwarder en Neebo löscht. In dat Huus hefft noch keen Lüüd wohnt. As de Füerwehr keem, hett dat all heel brennt – dor weer denn ok nich veel to retten. Löscht worrn is noch bet na'n fröhen Morgen.
För'n FC Sankt Pauli löppt dat ne'e Genootschopsmodell recht goot, so as dat utsüht. Na Informatschonen vun NDR 90,3 sünd bet Middernacht Genootschopsandelen för bummelig achtuntwintig Millionen Euro tekent worrn. Wo veel dat nipp un nau sünd, will Sankt Pauli in'n Mai seggen. Bet dor müssen all Andrääg afarbeidt ween.
Vundaag gifft dat recht veel Sünn. Dat blifft ok dröög. De Temperaturen klattert op bet to föffteihn Graad. Morgen warrt dat denn al en lütt beten warmer: bet to söventeihn Graad.
