Woans dat an'n Hamborger Hööftbahnhoff utsehn deit, doröver warrt jümmer wedder snackt. De Polizei sett op mehr Sekerheitspersonaal, mehr Kuntrullen un den Utbo vun't soziale Anbott. De Steed, de in de Bahnhoffsmission allens koordineren deit, de fiert nu ehr eenjohrig Bestahn. De Soziaalbehöörd süht de Arbeit dor as goot an un will dat Kunzept villicht ok op anner Stadtdelen röverhalen. Wat to hören is, kunnen dörch de Steed dörtig Minschen na Ünnerbringens hen vermiddelt warrn.
För mehr as 27-dusend Hamborger Jungs un Deerns geiht dat düt Johr mit de Vörschool un de School los. Dat gifft allens in allen 213 Grundscholen in de Stadt. De mehrsten Kinner kaamt na de Scholen hen, de se sik ok wünscht hebbt. De Öllern kriegt in de tokamen Daag per Post vun de Schoolbehöörd Bescheed.
In Thailand un Myanmar söökt se na dat swore Eerdbevern jümmer noch na Lüüd, de dor verschütt sünd. Man grote Höpen, dat se ok noch welk finnen doot, de dat överleevt hebbt, dat hebbt se nich. Sünnerlich in dat Land vun'n Brögerkrieg Myanmar is de Söök swoor. De Minschen buddelt deels mit bloße Hannen in de Trümmer. De Weltsundheitsorganisatschoon WHO hett meist dree Tunnen medizinsche Hölpmiddels levert. Ok in de Hööftstadt vun Thailand, Bangkok, sünd jümmer noch Minschen in den Rohbo, de dor instört is. Dat is gor nich so licht, dor een ruttohalen. Dor is allens instabil.
Grönland höört nüms annern to un bestimmt ok sülvst över sien Tokumst. Dat hett de nee wählte Regerensböverste Jens-Frederik Nielsen nochmal düütlich maakt. Dormit hett he de Besittanspröök vun US-Präsident Donald Trump nochmal kloor torüchwiest. Trump harr in en Telefoninterview mit den Senner NBC seggt, he weer sik to hunnert Perzent seker, dat de USA dat Land kregen.
De Elvtunnel is siet de Nacht wedder free. Un dat sogor en poor Stünnen fröher as dat mal plaant weer. Wieldes de Tunnel 50 Stünnen lang kumplettemang dicht weer, hebbt se en ne'e Tunnel-Zentraal boot. Dat is in düt Johr de eerst vun allens in allen teihn plaante Vullsparren op de A7 west.
Dat is vundaag recht wat wulkengries, sall aver noch beter warrn, so dat ok mal de Sünn rutkickt. De Temperaturen schafft dat noch op bet to 14 Graad bi mauen Wind ut Noordwest bet Noordoost. Morgen warrt dat noch en Stück warmer bi bet to 16 Graad, veel Sünnschien un mauen Wind ut Noordoost
In Süüdoostasien geiht de Tahl vun de Doden na dat swore Errbevern wieder na baven. In Myanmar hebbt se middewiel mehr as 1.000 Oppers tellt. Mehr as 2.300 Lüüd sünd bavento to Schaden kamen. Ok in Thailand glieks blangenbi geev dat Dode un Versehrte. Se söcht ünner de Trümmern noch na Minschen. Fachlüüd gaht dorvun ut, dat de Tahl vun de Doden in de Dusende gahn kunn. In de verleden Stunnen geev dat Dutzende vun Nabevern.
