In Hamborg hebbt güstern mehr as sössteihndusend Lüüd gegen en Optritt vun Afd-Baassche Alice Weidel demonstreert. Anmellt weern üm un bi 2000 Lüüd. Bi de Demonstratschoon sünd se mit Plakaten un bunte Fahnen dör de Hamborger Binnenstadt trocken. Mit dorbi weern ok mehrere linke Gruppen, Vereenen, Warkschoppen un Parteien. To den Protest opropen harr dat Hamborger Bündnis gegen Rechts.
Ok, wenn de Protest freedlich aflopen is: Alice Weidel hett bi ehrn Optritt in’t Hamborger Raathuus vun "Schlägerbanden" snackt, de vun Börgermeester Peter Tschentscher Stütt kriegen dään. Dat Ganze weer en Veranstalten vun de AfD-Börgerschopsfrakschoon, bi de de Kanzlerkandidaatsch Alice Weidel ok nochmal de Positschoon vun ehr Partei düütlich maakt hett. In ehr Reed hett se ok en Vergliek twüschen de Antifa un de SA trocken. De Grönen hett se as „Schwachköpfe“ betekent.
De ümstreden A26 dör den Hamborger Haven warrt toenn boot, dat hett Hamborgs Eerste Börgermeester Peter Tschentscher güstern nochmal toseggt – un twoors bi’t Neejohrsdrapen vun’n Ünnernehmensverband Noord. Verbannspräsident Philipp Murmann harr toeerst in sien Reed weniger Bürokratie verlangt, dorto ok noch mehr Investitschonen in de Infraktstruktur un dat de Lüüd mehr motiveert warrt, to arbeiten. Dat Neejohrsdrapen is dat woll wichtigste Drapen in‘n Noorden för de Wirtschop un de Politik. Üm un bi 500 Gäst ut Hamborg un Sleswig-Holsteen weern dorbi.
Üm un bi föffteihndusend Handwarks-Bedrieven gifft dat in Hamborg, un dat sünd vör allen Dingen dree Problemen, mit de se alltohoop to doon hebbt: Se veleert toveel Tiet dör den Stau op de Straten, se finnt blots schwor Parkplätz un: se hebbt to wenig Lehrjungs un-deerns. Düsse Sorgen hebbt se güstern den bövesterten Hamborger Kandidaten vun de SPD, den Grönen un de CDU verkloort – bi en Drapen in’e Handwarkskamer.
Se sünd sik woll nu eens, un de Wapenroh in’n Gaza-Striepen kümmt wohrschienlich doch. De Ministerpräsident vun Israel, Benjamin Netanjahu, hett för hüüt sien Kabinett för Sekerheit tohoopropen. Dat schall denn nochmal „jo“ seggen to dat Afkamen. Egens schull dat al güstern passeren, man denn weern, so sä dat Israel, doch noch Fragen op den Disch kamen. De Wapenroh, de schall nu eerstmal 42 Daag gellen. In düsse Tiet schüllt ok de Hamas-Gieseln ut Israel gegen de Palästinenser-Lüüd uttuscht warrn, de in Israel in Haft sitten doot.
Hüüt Avend, halvig negen, steiht in Herning in Däänmark dat twete Speel vun uns düütsche Mannschop bi de Handball WM an. Dor geiht dat denn gegen de Schwiez. De eerste Partie gegen Polen harr dat düütsche Team wunnen – mit 35 to 28.
Vundaag sünd in Hamborg toeerst mal wedder vele Wulken ünnerwegens. Later, dor gifft dat denn aver ok noch en Schangs op en ganz lütt beten Sonne bi Temperaturen bet to dree Graad, opstunns sünd dat een Graad in Barmbek. Morgen: jüst so as hüüt, bi Temperaturen bet to 2 Graad.
