Güstern op den Hamborger CDU-Parteidag, dor hett sik Parteichef Dennis Thering nochmal anbaden as Koalitschoonspartner, ok wenn de SPD al mit de Grönen över en Koalitschoon snacken deit. Rot-Swatt, dat weer beter as Root-Gröön, dat meent Thering. De Christdemokraten, de wüllt, dat grote Projekten as de Köhlbrandbrüüch un de A26 Oost gauer anpackt warrt.
Na en Massenklopperee in Harborg ünnersöcht de Polizei de Saak. Dor weren in de Nacht bet to 40 Lüüd op einanner daalgahn, deels ok mit Wapen. Rund 30 Peterwagens ut ganz Hamborg weren dor. Twee Minschen sünd to Schaden kamen. Söven hebbt se fastnahmen. De Polizei hett mehrere Daatwapen sekerstellt. So as dat utsüht, hebbt sik Tschetschenen un Kurden in de Hoor kregen, wegen en Striet vun welk vun jüm.
In Süüdkorea, dor veleert de Präsident nu sien Amt. Yoon Suk Yeol mutt sien Hoot nehmen, dat seggt dat korean’sche Verfatensgericht. De Macht, de harrn se em al vörher wegnahmen. Yoon harr en poor Maanden vöraf dat Kriegsrecht utropen – wat Kritiker seggt, üm siene Plaans dörchtokriegen.
In Hamborg hebbt de Lüüd faken Maleschen mit de Verwalten. In de verleden 14 Maand sünd bi Wollfohrtsverbänn mehr as 3700 Fäll mit Behörden mellt worrn. De meisten Saken bedrapen dorna dat Jobcenter un dat Amt för Migratschoon. Dor weer bi de Halv vun de Fäll nüms tofaat to kriegen.
Olymp’sche Spelen in Hamborg – de Plaans för en Bewarven warrt konkreter. As eersten Punkt wüllt se för dat Olymp’sche Dörp woll en ne’en Stadtdeel boen. As tweten Punkt: In’t tokamen Johr, dor kunn Hamborg in’n Fröhling oder Sommer ja oder ne to de Sommerspelen seggen.
Al güstern sünd de Hamborger spoortlich vöran kamen. Einmal bi’n Handball: De HSV Hamborg hett in de Bunnsliga gegen Potsdam wunnen, mit 28 to 23. Un bi’n Tennis: Eva Lys steiht in’t Veertelfinaal vun’t Turnier in La Bisbal d’Emporda in Spanien. Se hett gegen Marina Bassols Ribera in twee Sätz wunnen.
Vundaag schient de Sünn den ganzen Dag. Wulken gifft dat wenn denn blots as Dekoratschoon. Dat is dröög un mild. Bet to 21 Graad kriegt wi. Opstunns meet wi bi ju op de Veddel 7 Graad. Morgen köönt mal en poor Wulkenfeller dörchtrecken, man liekers schient de Sünn un dat is dröög bi bet to 12 Graad.
