Schüllt Handys an Scholen verbaden warrn? Över düsse Fraag warrt opstunns in ganz Düütschland veel wat över snackt. Denn in Hessen schüllt de Kinner un jungen Lüüd jümehr Handys in’e School privaat nich mehr bruken dröven. In Hamborg blifft dat aver dorbi, hier schall dat per Gesett keen Handyverbott geven. Man de Schoolbehöörd arbeidt an en Vörslag, wo denn binnen stahn deit, wat se de Scholen in düsse Saak anraden wüllt. Wannehr düsse Vörslag denn aver vörliggen deit, dat is noch unkloor.
En Hamborger Inkasso-Firma mutt woll, so as dat utsehn deit, 900.000 Euro wat an Straaf betahlen, wiel dat se sik nich an de Datenschuul holen hebbt. Dat is NDR 90,3 wies worrn un is ut den Datenschuulbericht ruttolesen. Düsse Bericht warrt vundaag vun Amts wegen her vörstellt. Alltohoop hett Hamborg in dat verleden Johr in de Saak, wat de Datenschuul angahn deit 1,2 Millionen Euro wat an Bußgeller intreckt. Dat is so veel as noch nie nich tovör.
Wat seker kann een in Düütschland leven? En Henwies för de Anter op düsse Fraag is villicht ok so’n beten wat ut de ne’e Kriminaalstatistik ruttolesen. Bunnsbinnenministersch Nancy Faeser warrt düsse Statistik vundaag op’n Disch packen un vörstellen. Vöraf is een al so’n beten wat an Daten wies worrn. So sünd verleden Johr alltohoop 5,8 Millionen Straafdaten tellt worrn un dat sünd 1,7 Perzent weniger as noch dat Johr tovör. Opkloren kunn de Polizei an’n Enn denn so bi üm un bi söss vun teihn Straafdaten.
In Frankriek hett de rechtsutrichte Politikersch Marine LePen nu doch noch en Schangs, dat se bi de Präsidentschop kannideren kunn. Vör twee Daag is se veruurdeelt worrn, wiel dat se Stüergeller ünnerslaan harr. Dat bedüüdt, dat se nich as Kannidaatsch antreden dröff. Man nu heet dat, dat dat eerst in ehr Beropensverfahren 2026 fastleggt warrt, wat dat so is oder nich. LePen snack in en eerste Reakschoon op düsse ne’e Saak vun en bannig gode Naricht.
Fief Daag lang hett he ünner Trümmer legen. Un nu is he, en 26 Johr ole Keerl, na dat swore Eerdbevern in Myanmar noch levend ut en tohoopfullen Huus ruthaalt worrn. En Team vun Reddenslüüd vun dor hett em tohoop mit Hölpslüüd ut’e Törkei an’t Licht halen kunnt. Alltohoop sünd in Myanmar, so as dat betto heten deit, bi dat Eerdbevern mehr as 2.700 Minschen üm’t Leven kamen.
En Eerstligist kriggt vun en Drüttligist een op’e Mütz. Dat is nu jüst wedder bi’n DFB-Pokaal so passeert. Arminia Bielefeld is dat ween un hett de Sensatschoon nu schafft, dat se na’t Finaal henkamen sünd. De Bielefelder hebbt dat Halffinaal wunnen un Leverkusen, den Titelverdediger, ut’n Pokaal rutsmeten. An’n Enn stünn dat twee to een. In dat Finaalspeel mutt Bielefeld nu Enn vun’n Maimaand gegen Stuttgart oder Leipzig ran.
Dor bruukt een vundaag nich veel wat över snacken: Warrt goot mit Temperaturen vun bet to achtteihn Graad. Un morgen kriegt wi dat Ganze denn glieks nochmal.
