To'n eersten Feriendag in Hamborg gifft dat noch mehr Kummer för Lüüd, de mit de Bahn verreisen wüllt. Na Süden to fallt al vele Töög ut oder föhrt later, wegen de Arbeiden an de Norderelvbrüch. Un vunaf hüüt Avend warrt dat ok na Noorden to komplizeert - twüschen Hamborg un Kiel geiht denn so goot as nix mehr. Ok twüschen Elmshorn un Niemünster warrt de Streck saneert. De Bahn seggt, dat mööt se in de Ferien trecht maken, wiel denn weniger Lüüd mit ’n Tog na Arbeit föhrt.
De AfD Schleswig-Holsteen plaant för tokamen Wekenenn en Drepen. Dat Kieler Binnenministerium seggt, dor warrt ok welk Organisatschonen mitmaken, wo de Verfatensschutz seggt, dat sünd mit Sekerheit Rechts-Extremisten. De AfD hett betto noch nich künnig maakt, woneem dat Drepen stattfinnen schall, man se seggt, dor warrt woll 150 bet 200 Lüüd dorbi ween. Dat Binnenministerium will dit Drepen in't Oog behollen.
Ok in Ünnernehmens in Hamborg mangelt dat an Fachlüüd, un wenn se fre'e Stellen besetten wüllt, denn steiht jem männich Maal de Bürokratie düchtig in'n Weg. En Ümfraag vun de Hamborger Hannelskamer wiest, dat de Firmen dor ünner lieden doot. Bi Bewarvers ut en Nich-EU Land duert dat bannig lang, be de ehre Dokumenten anerkennt warrt. In't Verkehrs-Gewarv un op'n Bo seggt dree Viertel vun de Ünnernehmens, dat en Opswung an'n dullsten dör de Bürokratie behinnert warrt.
De Polizei hett in Norderstedt in'n Kreis Sebarg twee Jungs ut Hamborg fastnahmen, un de schüllt tominnst fief Maal in Hüüs inbraken hebben. Wieder seggt de Polizei, dat de beiden man eerst ölven un 16 Johr oolt sünd. Gegen den 16-Johrigen gifft dat en Haftbefehl, de Ölvenjohrige is noch straafunmünnig. Mit de Polizei hebbt de beiden ok al vörher to doon hatt.
Siet Anfang dit Johr hett Hamborg meist 2,9 Millionen Euro an Hunnenstüer innahmen. De mehrsten Hunnen gifft dat in'n Bezirk Wandsbek: 26.000. In ganz Hamborg weern in't eerste Halfjohr bummelig 107.000 Hunnen mellt, dat sünd weniger as verleden Johr. Dat is bi en CDU-Anfraag an den Senaat rutkamen, un dat gifft mehr as 600 ünnerscheedliche Hunnenrassen in Hamborg.
De Dag bringt Sünnschien un Wulken, un dat blifft meist överall dröög, bi bet to 25 Graad. Nu (Klock negen) sünd dat in Osswarder 16 Graad. Morgen kann dat mit Nevel losgahn, un denn kriggt de Sünn de Böverhand, bi bet to 28 Graad.
Vundaag is in Hamborg de letzte Schooldag vör de Sommerferien un dormit geiht denn dat grote Reisen los. Un wokeen dorbi denn mit’n Auto losföhren deit, den raadt de ADAC, dat vundaag to maken, denn af Freedag kunn dat superlange Staus geven. De Flaaghaven raadt de Lüüd bitiets dortoween un blangen de Kuffers blots een Saak as Handpackelaasch to hebben. Un wokeen mit’e Bahn föhren deit, de mutt in Hamborg sünnerlich gode Nerven hebben jüst in Richt na Süden hen. Denn wegen Boarbeiden an’e Brüchen twüschen Hauptbahnhoff un Horborg sünd dor denn welk Töög later ünnerwegens oder fallt goors ganz ut.
