1,4 Miliarden Euro - so veel Geld stellt Hamborg in de tokamen Johrn praat, dat se de Watersystemen för de Tokunft seker maken köönt. Dor warrt also veel ünner de Eer arbeit. De Histor'schen Afwateranlagen mööt saneert warrn. Dat Pumpwark an de Havenstraat to't Bispeel. Hamborg stellt sik op jümmer mehr Regen in, so as wi dat ehrgüstern al beleevt hebbt.
Ik weet, woans een düssen Job maakt - dat seggt US-Präsident Joe Biden. Dormit antert he op dat Kritteln na sien Optritt bi en Fernseh-Duell gegen sien Rutforderer Donald Trump. Biden sä bi sien Wohlkamp-Optritt in North Carolina, he wöör villicht nich mehr so goot diskereren as fröher, man he wöör jümmer noch weten, woans een de Wohrheit seggen deit. Biden harr sik bi dat Fernseh-Duell jümmer wedder versnackt un enkelte Sätz nich toenn bröcht.
Dor hett de Welt henkeken: De Panama Papers hebbt den Verdacht an't Licht bröcht, dat överall in de Welt Politikers, Sportlers un Prominenten jemehr Geld in Stüeroasen versteken hebbt. In Panama hebbt se nu 28 Anklaagte freespraken. De Richtersch hett dat so seggt: De Bewiesen langt nich ut un een kann jem ok nich ganz navulltrecken.
In Hamborg warrt dat an't Wekenenn richtig vull. Dat gifft masse grote Veranstaltens. Eenmal sünd güstern de Harley Days losgahn. Poor dusend Bikers fohrt dörch de Stadt. Dat Schöönst för jem is morgen jemehr Paraad. Un denn reekt se vundaag noch mit mehre teihndusend Footballfans op't Hilligengeistfeld, de dat EM-Speel Düütschland gegen Däänmark sehn wüllt. Un dat is jümmer noch nich allens: Dor steiht ja ok noch de Halvmarathon in Hamborg an. Dor maakt ok poor dusend Lüüd aktiv mit. Un denn löppt ok noch de Rugby-Em in de Stadt.
Un de Kieler Week geiht op ehrn Hööchpunkt to. Bi de Windjammerparaad an'n Vörmeddag reekt se allens in allen mit mehr as 120 Scheep. Dor sünd ok 60 Traditschoonsseilscheep mit dorbi. De Gorch Fock föhrt de Paraad över de Kieler Föör an. Mit dorbi sünd ok de düütsche Bark Alexander von Humboldt II un de Thor Heyerdahl.
Dat Wedder för uns in Hamborg höllt sik vundaag noch ganz goot. Sünn un Wulken wesselt sik bi bet to 26 Graad jümmer wedder af. Un dat blifft dröög. Morgen süht dat denn al wedder anners ut. Dor is dat in een Tour an’t Pladdern bi blots noch bet to 19 Graad.
Dat Hamborger Kinnerkrankenhuus Wilhelmstift leggt mit en Spennenakschoon los – de gröttste, de dat siet Johren geven hett. So as NDR 90,3 un dat Hamborg Journal to weten kregen hebbt, geiht dat üm twee Millionen Euro, de dat Wilhelmstift tohoopsammeln will. De Achtergrund is en lege weertschopliche Laag, in de de Klinik steken deit. Dat is so as bi de mehrsten Kinnerkrankenhüüs in Düütschland. Wenn se dat Geld nich tohoopkriegen doot, denn kunn dat ween un dat Wilhelmstift mutt an anner Steed sporen un Saken wegstrieken.
