De Union hett güstern ehr Migratschoonsgesett nich dörch den Bunnsdag kregen- Nu warrt de CDU-Chef böös bekrittelt. Bunnskanzler Olaf Scholz sä in de ARD-Tagesthemen: Friedrich Maerz hett sik verzockt. Un he hett vör östereich‘sche Verhältnisse in Düütschland wohrschaut – also en Koalitschoon twüschen konservative un rechte Parteien. Kritik kööm ok vun de AfD. Parteichefin Alice Weidel hett Merz Föhrungsqualitäten infraag stellt. De CDU-Chef sülvst meent na de Afstimmen, dat de apen Debatt över de Saak dat wert west weer.
Ok in de Zivilsellschop gifft dat veel Kritik doran, dat de CDU tohoop mit de AfD in’n Bunnsdag afstimmt hett. In Hamborg hebbt güstern 25.000 Minschen demonstreert. Vundaag schall dat in vele grote Städer wiedere Protesten geven. In Hamborg wüllt Fridays for Future un annere Organisatschonen ünner dat Motto “Wer mit Faschisten paktiert, hat nichts kapiert!“ op de Straat gahn. De Polzei rekent vun Middag af an mit ornlich Maleschen bin’n Verkehr in de Binnenstadt.
De Hamborger Containerrederee Hapag-Lloyd un de dän’sche Rederee Maersk doot sik tosamen. Ünner den Namen Gemini – op Düütsch Zwilling/ op Platt Tweeschen – wüllt se tosamen Liniendeensten anbeden. Dat Teel: 90 Perzent vun de Container schüllt pünktlich ankamen. Opstunns sünd dat blots 50 Perzent, dat seggt Hapag-Lloyd-Vörstandschef Rolf Habben Jansen. Altohoop will de ne‘e Allianz rund 340 Scheep insetten.
In’n Gazastriepen hett de Hamas twee wiedere Gieseln freelaten. In’t Fernsehen weer live to sehn, wo en 54 Johr ole Mann un en 35 Johr ole Mann an dat Rode Krüüz övergeven worrn sünd. Un noch en Mann wüllt se vundaag freelaten. Dorför schüllt 90 Palästinensers ut israel’sche Haft rutkamen.
Vun hüüt af an nümmt de USA Sünner-Töll op Woren ut Mexiko, Kanada un China. Präsident Donald Trump sä, de USA harr grote Hannelsdefiziten mit düsse Länner. Wat Trump seggt, mutt op Importen ut Mexiko un Kanada 25 Perzent Toll betahlt warrn, föhr de ut China 10 Perzent. De Ministerpräsident vun Kanada Justin Trudeau sä, se wörrn ornlich wat dorgegensetten. Dat hebbt ok Mexiko un China ankünnt.
Vundaag is dat meist gries, aver dröög. De Sünn kann ok mal vörbikieken bi bet to 4 Graad. Opstunns meet wi bi ju in Reitbrook 1 Graad. Morgen hebbt wi ok Wulken, dat warrt gries un dröög. Mag ween, dat wi later ok noch en beten Sünn afkriegen doot. Dat Ganze bi bet to 3 Graad.
Welk Anwaltslüüd hebbt ut Protest den Hamborgischen Anwaltsvereen verlaten. Dat is NDR 90,3 wies worrn. Achtergrund is en Podiumsveranstalten to dat Thema „Rechtsstandoort Düütschland“. Un opregen doot se sik doröver, dat op düt Podium ok Alexander Wolf vun de AfD sitten schall. De Anwaltsfro Doris Dierbach stellt in en Apen Breef de Fraag: Fangt nu wedder de Juristen an, rechtsextreme Lüüd den Weg free to maken? De Anwaltsvereen seggt, dat se all de Parteien, de in de Börgerschop vertreden sünd, inlaadt harrn.
