Dat gifft jümmer mehr Staus in Hamborg un ümto. Minschen de dor ünnerwegens sünd, stunnen in’t verleden Johr üm un bi 13.300 Stünnen in’n Stau. Dat sünd 13 Perzent mehr as noch in’t Johr tovör. De ADAC hett sik de Tallen ankeken. Vergliekt een dat bunnswiet, denn liggt Hamborg dormit op Platz twee, achter Berlin. Grund för de Staus sünd de velen Bosteden.
In Hamborg gifft dat bummelig 221.000 Kinner un junge Lüüd an allgemeenbillen Scholen. Dat sünd 3.200 mehr as noch in’t verleden Schooljohr. Dormit is de Tall vun de Schölers nich so dull ropkladdert as in de verleden Johren. Wat Schoolsenatersch Ksenija Bekeris seggt, liggt dat doran, dat nich mehr so veel Lüüd vun de Flucht na Hamborg hen kaamt. Ut de Schoolstatistik kann een rutlesen, dat meist 35 Perzent vun de Schölers tohuuus keen oder blots ganz wenig Düütsch snackt.
De Bunnszentraal för polit’sche Billen sett hüüt Vörmeddag den so nöömten Wahl-O-Maten för de Bunnsdagswahl in’n Gang. Wählers köönt mit dat Programm in’t Internet kieken, wat för Parteien besünners dicht an jemehr egen Instellen sünd. Dorto kann de egen Menen över 28 Thesen mit dat Programm vun verscheden Parteien vergleken warrn. Dat gifft ok Utgaven in de Länner. To’t Bispeel för de Börgerschopwahl in Hamborg an’n 2. März.
Liekers Angela Merkel doran krittelt hett un de velen Lüüd, der dor in Düütschland op de Straat gahn sünd, blifft Unionskanzlerkandidat Friedrich Merz bi sien Kurs in de Migratschoonspolitik. To de Bläder vun de Funke-Mediengrupp sä he, he wöör de Demonstratschonen eernst nehmen. Man sien Partei wöör sik nich vun de strengeren Regeln bi de Migratschoon afbringen laten. Un en düütliche Mehrheit vun de Düütschen wöör düssen Kurs bi de CDU in düsse Saak för richtig hollen.
Dat Witte Huus bemöht sik, dat se dat, wat US-Präsident Donald Trump över de Tokumst vun’n Gazastriepen seggt hett, relativeert. De Palästinensers sullen blots vör en Tiet ümsiedelt warrn, sä sien Sprekersche Karoline Leavitt. US-Butenminister Marvo Rubio nööm Trump sien Vörstoot en groottöögsch Anbott. De Minschen kunnen twüschen all de tweien Saken, Schutt un Blindgängers nich mehr wahnen un müssen, bet se dat wedder opboot hebbt, jichtenswo hen.
Dat weer en ganzet Stück Arbeit för den Düütschen Meester, man an't Enn is Bayer Leverkusen doch noch na't Halffinaal vun' DFB-Pokal henkamen. Leverkusen hett den Tweetligisten Köln eerst in de Verlängern mit 3:2 slaan.
In de twete Footballbunnsliga speelt de HSV morgen an'n fröhen Avend bi Preußen Münster.
Dat warrt vundaag recht wat fründlich bi bet to söven Graad bi mauen Wind ut Noordwest. Morgen hebbt wi vele Wulken, wenig Sünn un af un an Flagen bi bet to veer Graad.
