De FC St. Pauli hett gegen den Noordrivalen Holsteen Kiel den eersten Heimsieg schafft – mit 3 to 1. De Verdediger Manolis Saliakas hett in de 25. Minuut dat eerste Dor schoten. Dat Team vun Trainer Alexander Blessin is in de Bunnsliga-Tabell dormit eerstmal op Platz 15 hoochkladdert.
De syr’sche Millionenstadt Aleppo is woll vun Russland ut de Luft angrepen worrn. Dat mellt de Syr’sche Beobachtungsstee för Minschenrechte, man offiziell is dat noch nich. Siet en syr’scher Afleger vun Al-Kaida an Medeweken unvermodens en grotten Angreep anfungen hett, hebbt de Terroristen woll al de Halv vun Alleppo ünner jümehre Kontrull. De Regimekräft vun Präsident Baschar al-Assad hebbt sik woll ahn to kämpfen ut Delen vun de Stadt torüchtrocken. Mag ween, dat se en Gegenanslagg vörberieden wüllt.
De Bunns-FDP steckt deep in en Slamassel – na Bunnsgeschäftsföhrer Carsten Reymann hett güstern ok de Generaalsekretär Bijan Djir-Sarai sien Hoot nahmen. Parteichef Christian Lindner will liekers mit sien Partei in‘n Wahlkampf trecken, ok wenn böös över dat D-Day-Papeer diskereert warrt. Dat hett he bi de ARD-Tagesthemen seggt. De FDP harr in dat intern Papeer den Ustieg ut de Ampel plaant un dorbi Militär-Begreep as „D-Day“ bruukt. Vun dat Schriftsstück, dor harr he nix vun wusst, so seegt Linder dat.
In Hamborg, dor sünd vele Parkzonen för Anwahners grötter, as dat egens rechtens is. Wat en Urdeel vun’t böversten Verwaltensgericht seggt, mutt de Parkzoon Grindelhoff dorüm anners maakt warrn. De annern 40 Parkzonen in de Stadt, de ok to groot sünd, de blievt eerstmal so. Dat seggt de Verkehrsbehöörd. Se will aftöven, wat villicht en Gesett kümmt, dat gröttere Parkzonen verlöven deit.
Dat duert länger as plaant, dat in Planten un Blomen dat Cafe Seeterassen wedder apen maken deit. Wat NDR 90,3 to weten kregen hett, is de ne‘e Twüschenmeder afsprungen. Nu wüllt se den tweiten oder drütten Berwarver fragen, wat he noch Interesse hett. Fast steiht aver, dat de Vereen „Petticoat & Nerendisch“ dor en Duerustellen över de 50er Johr maken will.
Vundaag is dat dröög, de Sünn schient un wi kriggt bet to 5 Graad. Opstunns meet wi bi ju in Ottensen 0 Graad. Morgen is dat meist so as hüüt.
De Instieg vun de Swiezer Reederee MSC bi den Hamborger Havenbedriever HHLA is nu afslaten. Denn de Stadt hett nu een för allemal en Deel vun ehr Aktien an de Reederee överdragen. MSC will na den Instieg mehr Fracht na Hamborg henbringen. Un denn wüllt se hier ok noch en ne’e Düütschlandzentraal boen, wo denn üm un bi 700 Lüüd arbeiden schüllt. De Warkschop Ver.di un vele Arbeitslüüd vun’e HHLA harrn sik gegen den Instieg utsnackt hatt.
