Vun de Soziolbehöörd gifft dat nu XL-Kita-Gootschiens. Se gellt johrenlang – bet de Kinner na School kaamt. Dat heet, en Drüttel vun de Kinner in Hamborg schüllt wat dorvun hebben. För Üllern, Bezirksämter un Kitas schall dat denn weniger Papierkraam geven. Blots Familien, wo de Kinner mehr as fiefuntwintig Wekenstünnen betüdelt warrn mööt, mööt wieder per Johr en Andrag schrieven.
An Flooghavens in Düütschland hett dat en IT-Utfall geven. Dorbi keem dat güstern to Problemen bi de An- un Afreis – ok an'n Flooghaven Fuhlsbüttel. In't hele Land is dat Sööksystem för Grenzkontrullen utfallen. So harr denn ok de Kontrull an de Flooghavens mehr Tiet bruukt as sünst, see de Bunnspolizei. Chaos harrn se man nich hat. Drapen weren so un so blots Lüüd, de nich ut'n Schengenruum kemen or welk de ut'n Schengenruum rut wullen.
Fröh an'n Morgen hett dat in Hamborg wedder sneet un de Winterdeenst vun de Stadtreinigen is al vun Klock twee af an op de Straten. Mehr as sövenhunnert Arbeiders streit de groten Straten un ok welk, wo Bussen föhrt: dorto Zebrastriepens un deelwies ok de Radweeg. Dat heet man nich, dat dat dor nich ok glatt ween kann. Güstern hett dat op Hamborgs Straten wegen dat Wedder dörtig Mal knallt un de Köhlbrandbrüch weer deelwies sparrt.
Gifft dat in Syrien en Chance op Freeheit? De EU wiest sik bereit, Syrien Hülp totostüern. Man, wat dorut wat warrt, is nich rut: Man wull sik bekieken, wat för en Politik de ne'n Machthebbers maakt. Bunnsbutenministersche Annalena Baerbock is jüst in Damaskus op Besöök ween un hett ok över de Rechten vun Froenslüüd snackt. En Handslag kreeg se vun'n ne'n Machthebber man nich. De Islamist Ahmed al-Scharaa geev man den franzööschen Butenminister de Hand.
In de Heinrich-Hertz-School an'n Stadtpark hett in de Nacht en Klassenruum brennt. De Füerwehr kunn dat Füer man gau löschen un müss de School achterher goot lüften. Woso dat brennt hett, hefft se noch nich rutfunnen.
Vundaag hefft wi wenig Sünn. Övern Dag warrt dat af un an ok wedder Sneeregen un Snee geven. Dat mach glatt warrn. Warmer as een bet twee Graad warrt dat vundaag nich. Üm un bi so blifft dat ok morgen. An'n Maandag warrt dat denn man wedder bannig warm: mit bet to teihn Graad.
De Hamborger Reddungsdeenst sleit sik siet Johren rüm mit mehr un mehr Insätz - bi gliektiedig to wenig Personaal. Dorüm köönt se jümmer wedder de Hölpsfristen nich inhollen. För en Nootfallversorgung, de funkschoneren deit, dor sett de Füerwehr dorüm ok op den Arbeitersamariterbund oder de Maltesers. Un de mööt jümmer wedder op Mitarbeiders to'n Utlehnen torüchgriepen, wiel ok se to wenig Personaal hebbt. Dat Problem dorbi: Vele Hölpslüüd kennt sik in de Stadt nich ut.
