In de Danzenden Tuurns op de Reeperbahn sitt bald ganz nee ok Behöörden mit binnen. Denn de Verkehrsbehöörd, de Weertschopsbehöörd un de Hamborger Marketingsellschop schüllt dorhen ümtrecken. Achtergrund is, dat an de ole Steed in den Olen Steenweg de Verdrag för de Hüer na twintig Johr aflopen deit. Üm un bi dusend Lüüd, de dor arbeiden doot, schüllt denn to’n Johrswessel 2026/27 ümtrecken. Jümehr ne’e Anschrift is denn "Reeperbahn Nr. 1". De Börgerschop mutt dat Ganze aver och afnicken.
In Hamborg schall dat in twee Johr wat stiller warrn, dorto will de Senaat, dat op noch welk Stratenafsnitten nachts Tempo dörtig gellen deit. För eenunveertig Strecken is de Plaan al handfast oder goors ümsett, bummelig söventig schüllt noch bavento kamen. De Oppositschoon is blangen anner Saken bang, dat de Verkehr utbremst warrn schall un dat dat an’n Enn gor nich stiller warrn deit.
Nu is se offizjell Kandidaatsch: Kamala Harris. Se is bi’n Parteidag vun de US-Demokraten in Chicago formell för dat Rennen üm dat Witte Huus nomineert worrn. Op den Parteidag treed ok wichtige Lüüd op, de Harris Stütt geven doot. De fröhere US-First-Lady Michelle Obama sä, dor leeg wat Magischet in’e Luft. Un ok ehr Keerl, Ex-Präsident Barack Obama, hett för Harris Reklaam maakt.
Över Daag henweg hett he vermiddelt, aver US-Butenminister Antony Blinken hett siene Nahost-Reis nu woll afbraken, ahn dat dor an’n Enn groot wat bi rutsuert is. Den letzten Stopp hett he güstern Avend in Katar maakt. Blinken möök dor noch mal ganz kloor, dat de USA en op lange Sicht israeelsche Besatten in‘n Gazastriepen aflehnen dee. Israel will de Kuntrull över twee Korridoren in dat Palästinenserrebeet aver nich opgeven. Un de Terrororganisatschoon Hamas seggt, dat een dat nich hennehmen kunn.
De Hamborger CDU hett üm un bi sösstig Lüüd as Kandidaten för den Börgerschopswahlkampf nomineert. Bavenan op’e List steiht Lannsbaas Dennis Thering, dorachter kummt denn Anna von Treuenfels op Rang twee. Ünner de eersten teihn sünd ok fief Froonslüüd mit bi. All schüllt se denn op en Parteidag in’n Septembermaand noch mal formell afnickt warrn.
Eerst sünd se bi de Olympischen Spelen mit bi ween, denn bi de Europameisterschop un nu bi dat Turneer hier bi uns in’e Stadt. Hamborgs Beachvolleyball-Teams hebbt ornlich wat op jümehren Zeddel stahn. Un vundaag nu leggt se mit de Qualifikatschoon an’n Rodenboom los. Af morgen speelt dor denn de besten Beachvolleyball-Teams vun’e Welt gegen’naner. To de Favoriten vun dat Turneer höört de Olympia-Tweten Nils Ehlers un Clemens Wickler un de beiden Froonslüüd, de Europameistersch worrn sünd, Svenja Müller un Cinja Tillmann mit to.
De Regen is eerstmal vörbi, nu hett de Sünn ne Tiet lang de Bavenhand. Dat duert aver nich al to lang, hüüt Namiddag, dor is denn de Regen wedder dor bi Temperaturen vun nich mehr as üm un bi twintig Graad. Opstunns sünd dat sössteihn Graad in Wandsbeek. Un de Dag morgen warrt dröger as vundaag un de Sünn kummt denn mehr un mehr rut bi Temperaturen vun bet to dreeuntwintig Graad.