Hamborg schall in 20 Johr klimneutral ween. All Wahnens un Hüüs dorför ümtoboen, dat warrt man 20 Perzent dürer as tovör utrekent. De taxeerten Kosten liggt bi 40 Milliarden Euro. So as NDR 90,3 exklusiv to weten kregen hett, ännert de Behöörd för Stadtbo dorüm ehr Plaans: Weniger massive Warmsdämmen un mehr klimafründliche Hittkastens, heet dat opstünns.
Dat Flüchtlingsquarteer in de Sophienterrass in Harvsthuud warrt Enn Juni een för all Mal dichtmaakt. Un vun deswegen gifft dat veel Hen un Her. Dorna gifft dat denn bet op een Steed in Eppendörp keen anner Ünnerkümst in en Viddel in de Stadt, in dat de mehrsten Lüüd gootstellt sünd. De Böverste vun de SPD-Frakschoon Dirk Kienscherf mahnt, dat son Quarteren gliekmatig op dat Stadtrebeet verdeelt warrn schullen. Op dat Flach vun de Sophienterrass schüllt nu Sozjalwahnens boot warrn.
Europa will düütlich oprüsten. Wo dat Geld dorför herkamen un woans dat opbest insett warrn schall, dor snackt vundaag de EU-Finanzministers den tweten Dag na de Reeg in Warschau över. In de Inladen vun den poolschen Finanzminister Andrzej Domanski heet dat, wieldat nich veel Geld in de Kassen is, müss een Investitschonen in de Verdedigen beter afstimmen. Betnu ordert de EU-Staten mehrstendeel lüttere Bestellens bi Herstellers ut’t egen Land.
Na dat jichtenseen Ding op en Bosteed an den Horborger Busbahnhoff funnen worrn is, weet se jümmers noch nich, wat dat is. Folgens Füerwehr kann dat Objekt in ölven Meter Deep allens ween – vun en ole Baadwann bet to en Blindgänger. De Kampmiddelrüümdeenst ünnersöcht den Fund morgen fröh. Schull dat würklich en Bomb ut den Tweten Weltkrieg ween, denn kunn sik dat bannig op den S-Bahn- un Feernverkehr utwarken.
En Stroomutfall in en Pleegheim in Willemsborg hett güstern Namiddag en Grootinsatz vun de Füerwehr utlööst. In de Inrichten vun pflegen & wohnen“ in de Herman-Westphal-Straat gifft dat veer Patschenten, de beatent warrn mööt. Vun dorher rück ok dat Technische Hölpswark an, üm de Stroomversorgen gau wedder hertostellen. Folgens Füerwehr is dat ok glückt, se müssen keen Lüüd, de in dat Pleegheim wahnt, evakueren.
Dat weer för vele Fans keen gode Överraschen: In de Twete Football-Bunnsliga müss de HSV en Dalslag hennehmen, wat de Schangs op en Opstieg angeiht. De Kru hett tohuus gegen Brunswieg mit 2 to 4 een op de Mütz kregen. In dat twete Speel an’n Freedag hebbt Greuther Fürth un Köln 1 to 1 liekop speelt. In de eerste Bunnsliga is Wolfsburg mit 2 to 3 vun Leipzig afrüüscht worrn. De FC St. Pauli speelt vunnamiddag butenwarts gegen Holstein Kiel.
De Dag fangt diesig un mit vele Wulken an. Över Dag schafft de Sünn dat denn rut un de Namiddag warrt mit 20 bet 21 Graad schöön warm, dat blifft dröög. Opstünns sünd dat noch 8 Graad an de Bill. Morgen geiht de Dag dröög un mit en beten Sünnschien los. Vun Westen treckt man dichte Wulken op, de den een oder anner Schuer mitbringt, mag ween ok mit Blitz un Donnerslag. Dat Ganze bi 18 bet 19 Graad.
