En Lichtershow in't Stadion, poor teihndusend Tokiekers an't Jubeln un Hollywood-Star Tom Cruise, de sik vun't Stadiondack afseilt. Mit en Gala sünd de Olympschen Spelen vun Paris toenn gahn. IOC-Präsident Thomas Bach hett seggt, dat de Wettkämpf nu toenn sünd un kort vör Middernacht is de olympsche Flamm denn ok ut gahn. Ut Hamborg weern dor 39 aktive Lüüd bi Olympia mit dorbi. Söss hebbt Medaillen wunnen.
Eerst hett dat noch na en lütt Füer utsehn. Man denn mussen Lüüd kamen, de Bomben den Tünner rutdreihen doot. Vunnacht is de Füerwehr Hamborg wegen en Brand in't Charlotte-Paulsen-Gymnasium in Wandsbeek utrückt. As se denn dor weern, hebbt de Insatzkräft wat sehn, wat as en Sprengsatz utseeg. Wat de Polizei NDR 90,3 sä, sullen dor LEDs an dat Ding blinkt hebben. Fachlüüd hebbt den Gegenstand mit Hölp vun en Entschärfens-Roboter mitnahmen. Noch is nich rut, wat dat dor wohrhaftig en Gefohr geev oder nich.
In Grekenland maakt sik wedder Wooldbränn breet. Dütmal geiht dat so fix, dat de Behörden de histor'sche Stadt Marathon evakueert hebbt. Mehr as 30.000 Inwahners sünd ut jemehr Hüüs rut un in en Oort an't Meer bröcht worrn. In de Hauptstadt Athen sall een to't Deel dicken Rook sehn könen. Regerensböverste Kyriakos Mitsotakis hett sien Urlaub afbraken.
Keen Beer, keen Wien, keen Piccolo - siet veer Maanden dröff een an'n Hauptbahnhoff keen Alkohol mehr drinken. Un de Düütsche Bahn is tofreden. Sünnerlich mutt dat Reinigenspersonaal nich mehr so veel Buddels un Schören insammeln. Bi vele Straafdaten an'n Hauptbahnhoff hett Alkohol en Rull speelt, dorüm hebbt se dat verbaden.
Veel Sünnschien un meist 30 Graad. Dat gifft jümmer mehr hitte Daag as vundaag. Dorüm arbeit de Soziaalbehöörd nu an en Aktschoonsplaan. De nimmt sünnerlich Rücksicht op Lüüd ahn Ünnerdack. Se kaamt faken nich an frischet Water ran. De Soziaalbehöörd wiest op Steden hen, wo se sik ok an'n Dag ophollen köönt. Dor kann een ok duuschen un sik afköhlen. Un denn köönt sik de Lüüd, de keen Wahnung hebbt ok in Inrichtens vun de Diakonie över Dag ophollen.
Dat gifft Stadtdelen in Hamborg, dor warrt opstunns mehr Rotten mellt as sünst. Sünnerlich drapen is dor de Gegend twüschen den Bahnhoff Altnaa und dat Raathuus Altnaa. Dat mag ok doran liggen, dat dor rund üm den Platz vun de Republik vele Wilddeerten un Vagels fodert warrt. Dat treckt ok Rotten an. Man en Rottenplaag in heel Hamborg gifft dat, wat de Behörden seggen doot nich.
Freren mööt wi vundaag al mal nich. Dat gifft Sünnschien satt bi bet to 28 Graad.
Morgen kaamt denn twoors ok noch en poor Wulken dorto, un womööglich kann dat enkelte Flagen geven, man bi bet to 32 Graad kann’t denn ok bannig schwül warrn.
