Anslaag op Wiehnachtsmarkt in Magdeburg – dor is güstern Avend en Mann mit en Auto in en Masse vun Minschen raast. Veer Minschen sünd woll dootbleven – minnstens 200 wiedere woll deels swoor to Schaden kamen. Dat mellt de Bild. Den Verdächtigen hebbt se kott dorna to faat kregen. Dat is en 50 Johr ole Mann ut Saudi-Arabien, de 2006 na Düütschland kamen weer un toletzt as Dokter in Sachsen-Anhalt arbeid hett. Bi de düütschen Behöörden weer he betnu nich as Extremist bekannt. Wat de Medien mellt, hett he woll apen mit de AfD sympathiseert un mehrmals Saken gegen den Islam seggt.
In’n Parlamentar’schen Ünnersökensutschuss to’n CumEx-Schandal, dor hebbt güstern Hamborgs ehemaligen Börgermeister Ole von Beust un sien Nafolger vun dormals Christoph Ahlhaus utseggt. Dörbi güng dat üm de Stüergeschäften vun de HSH-Noordbank. Beide hebbt seggt, dat se nix dorvun wusst harrn. Vör se güng dat vör alln üm de prekäre Laag vun de Bank. De HSH-Nordbank hett twüschen 2008 un 2011 Kapitalertragsstüern torüchbekamen, wat nich rechtens weer un 2014 rund 126 Millionen Euro an de Stüerverwalten torüchbetahlt.
Volkswagen un de IG Metall sünd in’n Tarifstriet eens worrn. Bet 2030 schall dat keen Künnigen vun Bedrievs wegen geven. De Beschäftigten schüllt dorför ahn Lohnerhöhungen utkamen. Bavento will de Kunzern in de tokamen Johren 35.000 Jobs afboen, so dat dat soziaal verdreeglich is. Kottfristig wüllt se ok keen Warken dicht maken. In Osnabrück schüllt – wat VW seggt – vun Sommer 2027 af an keen Fohrtüüch mehr boot warrn, in Dresden al vun Enn vun’t tokamen Johr.
Fuerwehrinsatz an’n U-Bahnhoff Feldstraat: Dor is an’n Avend en Mann twüschen en Toog, de inföhrt weer, un den Bahnstieg inklemmt worrn. De Hölperslüüd hebbt den Mann ruthaalt. He is swoor verletzt in’t Krankenhuus kamen. Wo dat alls passert is, dat is noch unklor. De Linie U3 weer för den Insatz in beide Richten sparrt.
De US-Kongress hett den Övergangshuushoolt tostimmt un en Shutdown afwennt. Dat Repräsentantenhuus hett de Twüschenfinazeren bet to’n 14. März dörchwinkt, in de Nacht to Sünnavend, blots 38 Minuten, bevör de Frist aflopen weer. Präsident Joe Biden harr al sien Jo signaliseert. De Etat is so liek as en Vörlaag, de de Republikaners in’t Repräsentantenhuus ornlich bekrittelt un denn aflehnt harrn. De Kritikpunkte sünd nu streken worrn.
De AfD-Ehren-Vörsitter Alexander Gauland weer güstern in’t Hamborger Raathuus to Gast. De AfD-Fraktschoon harr em inlaadt. In en Anspraak hett he Kanzler Olaf Scholz würdigt för sien Kurs in de Ukraine-Politik, vör allen, wat denn Ümgang mit Wapenlevern angeiht. Den CDU-Kanzlerkandidaten Friedrich März hett he hingegen bekrittelt un vörsmeten, dat he krigesbegeistert weer. Gauland hett sik för en Kompromissfreden mit Russland utsproken. Gegen sien Optritt harrn Dutzende Minschen an’n Jungfernstieg protesteert.
Vundaag is dat gries mit dichte Wulken, af un to Schuers. Later an’n Dag regent sik dat in. Dat Ganze bi bet to 8 Graad. Opstunns meet wi bi ju op St. Pauli 6 Graad. De Wind weit ut Süüdwest, eerst middeldull, later wat dat duller un kann ok ornlich opbrusen. Morgen is dat ok nicht veel beter: Wulken, Schuers, deels mit Graupel vermengeleert bi bet to 7 Graad. Wind ut Westen, middeldull bet frisch, deels mit stürm’sche Böen.
