De Ukraine kriggt keen Satellitenbiller mehr vun de Amerikaners. Dat Amt, dat in de USA tostännig is, sä: De Togang to de Biller weer nu eerst mal nich mehr apen. De Ukraine bruukt de Satellitenbiller in'n Krieg gegen Russland: to'n Bispeel, üm to sehn, wo sik Truppen bewegt. US-Präsident Donald Trump harr al Anfang vun de Week de Militärhölp för de Ukraine stoppt.
Dat Utbaggern vun de Elv weer en Fehlslag. So see dat Hamborgs Umweltsenater Jens Kerstan vun de Grönen bi NDR 90,3. Per Johr müss för hunnert Millionen Euro nee utbaggert warrn – blots, dat dat nich wedder verslickt. Op Duer weer dat nix, see Kerstan. Dorto geev dat jümmer mehr Schadens an de Dieken un anner Bowarken an't Över. Kerstan, de al bekannt maakt hett, dat he na de Börgerschopswahl ut de Politik rut will, see: Man schull de Elv nich jümmer wieder utbaggern. Dat weer beter, wenn de Havens in Noorddüütschland mehr tosamenarbeiden wören.
In Berlin sünd de Union un de SPD wieder an'n snacken, wo se tosamen en Koalitschon maken kunnen. An'n Avend güng dat ünner annern üm de Renten, dat Börgergeld un'n Arbeidsmarkt. Wat dorbi rutsuert is, is man noch nich publik. Vundaag schall man wiedersnackt warrn un in'n Loop vun't Weekenend wullen se dormit dörch ween, heet dat. De grote Fraag is ok, wat sik de Parteien bi't Thema Migratschon enig warrt. De Plaans vun de Union sünd en goot Deel scharper as de vun de SPD.
An'n Internatschonalen Froendag gaht vundaag weltwiet Froenslüüd för jümehr Rechten op de Straat. Ok in Hamborg sünd en Reeg Demos anmellt – in de Summ warrt dor mit en poor Dusend Lüüd rekent. De Paritäätsche Wohlfahrtsverband will ünner annern, dat Froens un Familien beter ünnerstütt warrt, mehr Froenquoten un dat Froenslüüd beter vör Gewalt schuult warrt. De DGB Noord harr giern, dat de Froendag ok in Hamborg Fierdag warrt. Dat is al in Berlin un Mekelnborg-Vörpommern so.
An'n Namiddag speelt de FC Sankt Pauli in de Football-Bunnsliga bi'n VfL Wolfsborg. Naletzt harr Pauli veer Mal in Reeg verloren; nu will dat Team vun Alexander Blessin endlich mal wedder winnen. Man Blessin see ok: Sankt Pauli weer jo noch veer Punkten vun de Afstiegsräng weg – un so weer de Utgangslaag goot. De HSV speelt vundaag ok: An'n Avend geiht dat to Huus gegen Fortuna Düsseldörp üm'n eersten Tabellenrang in Liga Twee.
Vundaag gifft dat veel Sünn un dat blifft ok dröög. De Temperaturen klattert bet op achtteihn Graad. Ok morgen blifft dat noch sünnig un dröög. Man dat warrt nu wedder en lütt beten köler. Sünndag bet to föffteihn Graad – un tokamen Week geiht't wieder bargdal.
Mööt Redereen bald wat an Straaf betahlen un dat denn ok noch in en Höög vun Millionen? So as dat utsehn deit, is dat woll de Plaan vun de US-Regeren vun Donald Trump. Denn dorna to uurdelen schüllt Scheep, de in China boot worrn sünd un de denn Havens in’e USA anlopen doot, düchtig wat betahlen möten. Un düsse ganze Saak güng denn ok de Rederee Hapag Lloyd in Hamborg wat an, denn bi jüm stammt een Viddel vun‘e Scheep ut China. De Böverste vun’n Vörstand bi Hapag-Lloyd Rolf Habben Jansen will nu aver eerstmal aftöven, bet düsse Plaans nu nipp un nau op’n Disch liggen doot.
