Na dat Chaos in'n Erfurter Landdag hett de CDU bi den Striet mit de AfD en Schritt na vörn maakt. De Verfatenshoff Thüringen hett en vörlöpig Anornen rutgeven. Dorna mutt de Öllerspräsident vun'n Landdag, Jürgen Treutler vun de AfD, över en Frakschoonsandrag afstimmen laten. In den Andrag verlangt CDU un BSW, dat bi de Wahl vun den Landdagspräsidenten all Frakschonen vun'n eersten Wahlgang an Kandidaten opstellen köönt - un nich blots de AfD as starkste Frakschoon. De Landdag kümmt in düssen Ogenblick wedder tosamen.
Israel geiht wieder düütlich gegen de Hisbollah-Miliz in'n Libanon vör - ok in de Nacht. Mehre hunnert Lüüd flücht ut de Hauptstadt Beirut. Wat bi den dullen Luftangreep güstern de Böverste vun de Hisbollah Hassan Nasrallah to Dode kamen is, weet een noch nich. Folgens de israeelsche Armee gellt de Angreep dat Hauptquarteer vun de Schiiten-Miliz. Dat weer woll ünner de Wahnhüüs versteken.
De Hamborger Grönen wüllt vundaag över dat Regerensprogramm för de Börgerschopwahl snacken. Man bi de Lanns-Liddmatenversammeln in Willemsborg warrt dat woll ok in de aktuelle Laag vun de Bunnspartei gahn. Nadem de Bunnsvörstand künnig maakt hett, dat he sik torüchtrecken warrt un welk bi de Gröne Jöögd rutgahn sünd, dor gifft dat nu ok in Hamborg Arger. Schoolfachfru Ivy May Müller wesselt na de Linkspartei hen. Man ehr Mandat as Börgerschopafornte will se mitnehmen.
Düt Wekenenn warrt dat wedder an poor Steden eng. De A7 is noch bet morgen fröh twüschen Stellingen un Heimfeld sparrt. To glieke Tiet is ok de Köhlbrandbrüch dicht - bet Maandagfröh. ADAC-Spreker Christian Hieff nöömt dat "en Klopper". He fraagt sik, woso beide Bosteden an een Wekenenn inricht sünd. De Hamborger Verkehrsbehöörd maakt düütlich: De verscheden Akschonen sünd eng op'nanner afstimmt. Se sparrt de beiden Steden bewusst an een Wekenenn un nich in de Ferientiet.
De Hamborger Schoolmeester un Autor Heiko Thomsen warrt hüüt vörmiddag mit den mit 10.000 Euro doteerten Fritz-Reuter-Pries vun de Carl-Toepfer-Stiften utteekt. Mit den Pries ehrt se em för sien groten Insatz für de Plattdüütsche Spraak: Thomsen schrift as Autor un Redakteur för de Tietschrift vun de Hamborger Quickborn-Vereenigen, bringt plattdüütsche Texten to verscheden Themen in sien egen „Edition Molenkieker“ rut – un ok in’n Vörstand vun de Klaus-Groth-Sellschop is he aktiv.
De Harvst is dor, un schon pladdert dat denn ok jümmer wedder mal. Man Twüschendörch kiekt liekers ok mal de Sünn vörbi, mehr as 13 Graad kriegt wi aver vundaag nich mehr. De Wind weiht ok noch recht frisch ut Noordwest bet West.
Morgen wesselt sik Sünn un Wulken jümmer wedder af, liekers schuert dat af un an ok mal bi bet to 15 Graad.
De Krieg in de Ukraine, de bedroht ganz Europa – uk Düütschland. Dorüm öövt üm un bi 100 Soldaten mit Wapen utstafeert in Tarnuniform in’n Hamborger Haven för den Eernstfall. Geiht üm ünnerscheedliche Szenarien – ünnern annern hebbt se en Checkpoint opboot. Se wüllt de Infrastruktur seker stellen, för den Fall, dat dat en internatschonale Kries geven deit.
