Hamborgs Stadthuushoolt för de neegsten twee Johr is beslaten: 44 Milljarden Euro is he hooch. To’n Afsluss vun’t Snacken över den Huushoolt harr de Börgerschop dat güstern vun de Utgaven för Sekerheit – un dor güng dat hooch her. De CDU snack vun Kriminalität, de anstiegen wörr, de AfD sogor vun Wildwest-Schetereen. De SPD op de anner Siet wies dorop hen, dat Moord- un Dootslag-Verbrekens düt Johr üm 52 Perzent trüchgahn weren.
De Sozjalbehöörd will mit de Krankenhüüs snacken, üm dat Versorgen vun Dacklosen beter optostellen, de entlaten warrt. Minschen ahn Dack över’n Kopp warrt faken vun een Steed na de neegste hen schickt, oder lannt op de Straat – ehrdat se denn wedder na’t Krankenhuus kaamt. Bet Enn vun Novembermaand sünd düt Johr meist 1.100 Minschen ahn fasten Wahnsitt in Hamborger Krankenhüüs bedoktert worrn.
In den neegsten Bunnsdag warrt weniger Afornten ut Hamborg sitten as nu. Dat hett de Bunnswahlleidersche utrekent. Liggen deit dat an dat ne’e Wahlrecht: Nich elkeen Kandidat, de en Wahlkreis winnen deit, warrt ok automaatsch in den Bunnsdag intrecken. Dat geiht blots, wenn de Partei ok noog Tweetstimmen kregen hett. Mit dat ne’e Wahlrecht schall de Bunnsdag lütter maakt warrn.
Kriminellen maakt opstünns mit Nettbreven Druck op Lüüd in Hamborg. Dor steiht binnen, dat se Ümweltafgaven betahlen schüllt, de dat man gor nich geven deit. As Afsenner is dor dat Amtsgericht Hannover nöömt. De Bedregers drauht in jümehr Schrievens, dat se Saken vun de Lüüd pannen wörrn, wenn nich betahlt warrt. Wokeen so en Mail kriegen deit, kann den Afsenner bi de Polizei mellen – un op gor keen Fall schull he betahlen.
De Bunnsdag stimmt vundaag nochmal över en Reeg Gesettvörslääg vun de fröhere Ampel-Regeren af. Eerstmal geiht dat dorüm, dat Bunnsverfatensgericht beter to schulen. Dat Grundgesett schall so ännert warrn, dat de Unafhangigkeit vun’t Gericht nich mehr mit en eenfache Mehrheit vun’n Bunnsdag ännert warrn kann. Un denn schall vunwegen de Stüerlast wat op’n Weg bröcht warrn: Vun Januormaand af an schall dat mehr Kinnergeld un en högeren Kinnerfreebedrag geven.
De Cap San Diego kann ehr neegste Utstellen över de Geschicht vun’e Schippfohrt nich apenmaken: Se steiht finanzjell nich goot dor. Üm de Arbeiden dorför aftosluten, fehlt bummelig 50.000 Euro. De müssen in den Brandschuul op den olen Stückgootfrachter rinstaken warrn. De Brandschuulanlaag nee to maken köst 150.000 Euro. De Geschäftsföhrersche hööpt nu, dat de Lüüd för dat Schipp mit lange Geschicht spennen doot.
Vundaag hebbt de Wulken de Bavenhand un dat gifft ornlich wat Natts vun baven. Över Dag warrt dat weniger. De Wind dorto blaast düchtig, to’n Deel ok mit stöörmsche Böen. Bi 11 bet 12 Graad is dat wedder teemlich lau, man an’n Namiddag warrt dat denn koler. Opstünns sünd dat 12 Graad in Niendörp. Morgen kriegt wi de Sünn mal wedder to sehn. Man dat gifft ok Regen, Graupelschuern un ornlich Wind. Dat Ganze bi 6 bet 7 Graad.
