Hamborg sien gröttsten Bezirk is Wandsbeek un dor wüllt tokamen Tieden SPD, Gröne un FDP tohoop regeren. Un dat liekers de CDU bi de verleden Bezirkswahl knapp wunnen harr. CDU Lannsböverste Dennis Thering snackt vun en bittere Entscheden för Wandsbeek. Vör allen Dingen smitt he de SPD vör, dat de sik gegen de CDU richt hett, wenn een dorbi op de Börgerschopswahl in’n März kieken deit.
In Hamborg geiht vundaag för de bummelig 138dusend Lüüd, de in’e noorddüütschen Metall- un Elektroindustrie arbeiden doot, dat Snacken över de Tarifverdrääg los. Vöraf gifft dat opstunns noch en Demonstratschoon, de vun dat Hilligengeistfeld na den Grootneemarkt hengahn deit. Dor schall denn, so as de IG Metall dat seggt, ok de Afslusskundgeven stattfinnen. De Warkschop verlangt för de Arbeitslüüd söven Perzent mehr wat an Geld bi en Tarifverdrag, de twölf Maand lang lopen deit. Un Lehrjungs un -deerns schullen hunnertsöventig Euro mehr kriegen.
Op Donald Trump hett dat woll al wedder en Moordanslagsversöök geven. So as de Secret Service dat sä, speel Trump jüst Golf in Florida, as dat passeren dee. To seeg dor een vun jümehr Lüüd mit mal dat Röhr vun en Scheetgewehr ut en Busch rutkieken. Un denn kunn een woll al hören, dat schaten worrn is. Trump kööm bi de ganze Saak nich bi to Schaden. Den Keerl, de mootmaatlich schaten hett, den hebbt se later fastnahmen hatt. He schall woll 58 Johr oolt un en US-Börgersmann ween. So as dat heten deit, schall de Keerl Trump in’e US-Medien as Gefohr för de Demokratie betekent hebben.
In Polen un Tschechien versöökt de Lüüd ümmer noch gegen dat bannig vele Water gegenantogahn. Ok in Nedderösterriek is de Hoochwaterlaag na den velen Regen teemlich leeg. In mehre EU-Länner sünd welk Minschen bi de Överswemmen bi üm’t Leven kamen. Ok in’n Oosten vun Düütschland stiegt de Waterstänn. Hier is dat allens aver nich ganz so dull, as se dor egens bang vör ween sünd.
In Hamborg müss güstern Avend dat Speziaalinsatzkommando utrücken. Denn in Wandsbeek harr en benusselt, föfftig Johr olen Keerl sien Naversmann mit en Waap bedrauht. Vöraf harrn sik de beiden Mannslüüd streden hatt. As de Schandarms de Wahnung in’e Straat ‚Bi de Hopfenkarre‘ nakieken dään, dor fünnen se denn en Schreckschusspistool. Bi de ganze Saak bi to Schaden kamen is aver nüms. De föfftig Johr ole Keerl is eerstmal ne Tiet lang bi de Polizei in Verwohr kamen.
In’e Football-Bunnsliga hett de FC Sankt Pauli in sien drüttet Speel ok sien drütte Nedderlaag hennehmen müsst. In Augsburg reck dat man blots för en een to dree. De Kiezkickers staht in’e Tabell nu achter Holsteen Kiel op den vörletzten Rang. In’e tweten Liga harr de HSV vöraf in’t Volksparkstadion mit fief to null gegen Regensburg wunnen.
Ganz so veel Wulken as hüüt morgen warrt dagsöver woll nich ünnerwegens ween, so dat hier un dor ok noch mal ’n beten wat de Sünn dörkieken deit bi Temperaturen vun bet to twintig Graad. Un de meisten Lüüd warrt vundaag woll dröög dör den Dag kamen. Morgen kladdert de Temperaturen denn op bet to tweeuntwintig Graad un de Sünn kummt denn ok noch mal ’n beten wat mehr rut as vundaag.
