De Union will in'n Bunnsdag, dat een bi't Recht op Asyl strenger warrt. To Noot ok mit de Stimmen vun de AfD. Dat geiht dorbi üm dat so nöömte "Tostroom-Bregrenzensgesett". Ok in de Hamborgsche Börgerschop is Migratschoon en Thema. Vundaag in de aktuelle Stünn. De Hamborger CDU verlangt Utreisearresten, dat is so en Oort Haft. Binnensenater Andy Grote wohrschaut: In Hamborg leevt üm un bi 9.000 Minschen, de utreisen mööt. Arrest wöör denn en Masseninhafteren bedüden un dat is gegen de Verfaten.
Wat för Themen beschäftigt de Arbeitnehmers vör de beiden Wahlen, de dor in Hamborg anstaht? Dat weer Thema in de Wahlarena vun'n Hamborger DGB. Inlaadt weern de Kandidaten vun de grötteren un twee lüttere Parteien, man nich vun de AfD. Dennis Thering vun de CDU muss verklaren, woso dat Woort Warkschop nich in't Wahlprogramm vun de CDU opdükert. De BSW-Kandidat will, dat een wedder Gas ut Russland köpen deit. Dat hebbt se mit Buh-Ropen quitteert.
De Bunnspolizei hett dat Verbott vun Wapen in de S-Bahn un an masse anner S-Bahnhööv in Hamborg bet to't Enn vun Februar verlängert. En allgemeen Wapenverbott in't Rebeet vun'n HVV hett de Senat al in de Merrn vun'n Dezember op'n Weg bröcht. Dat gellt för U-Bahnen mit all Stoppsteden un Bussen. Utnahmen gifft dat to't Bispeel för Handwarkers, Sekerheitslüüd un Pfadfinders.
En dunen Radfohrer kunn in de Nacht in‘n letzten Ogenblick vör en S-Bahn rett warrn. Heer weer woll an'n S-Bahnhoff Wandsbeker Chaussee op den Bahnstieg fohrt un denn mit sien Rad rünner op de Schienen fullen. En Mann, de dat sehn hett, kunn den Radfohrer dor ruttrecken. Kort dorna hett de Bahn dat Fohrrad överrullt. Füerwehrlüüd mussen den Tog per Hand torüchschuven, dat se de Trümmer dor ruthalen kunnen.
Dat warrt vundaag en griesen Dag mit vele Wulken un Regen bi bet to 7 Graad.
Morgen süht dat ganz liek ut. Lütt beten weniger Regen villicht, man jüst so veel Graad bi mauen Wind ut Süüd bet West.
En Besööksplicht bi Gedenksteden to'n Natschonaalsozialismus - dat schall nu kamen för all Schölerinnen un Schölers, seggt de Hamborger Schoolsenatersch Ksenija Bekeris. Bet nu weer dat Besöken freewillig, kunn aver ween, dat sik dat al in't neegste Schooljohr ännern deit. De Baas vun de Gedenksteed Neegamm, Oliver Wrochem, de is sik aver nich seker, dat Plichtbesöken en gode Idee sünd. He meent, wenn dat wat bringen schall, denn is Dwang nich dat Beste.
Dat kummt nu so, as de ne'e Präsident Donald Trump dat al anseggt harr: De USA sünd rut ut de Weltgesundheitsorganisatschoon WHO, un dat gellt nu glieks. För de WHO weern de USA bet nu mit Afstand de gröttste Geldgever. De Organisatschoon wohrschaut nu, dat dat Gegenangahn gegen Krankheiten un Süken ahn de USA ehrn Bidrag sworer warrn kunn. Dat gifft aver noch en Övergangsfrist vun een Johr, un överto mutt de Kongress noch tostimmen.
