Oorten ünner Water, Dammbröken, Evakuerens un jümmer wedder ne'en Regen. De Saak mit dat Hoochwater warrt in poor Gegenden vun Bayern un Baden-Wörttembarg jümmer leger. Jümmer mehr Minschen mööt ut jemehr Wahnungen un Hüüs rut. In Bayern kämpft bummelig 40.000 Insatzkräft gegen dat Water an. Een Füerwehrmann is dorbi to Dode kamen. Vundaag will Bunnskanzler Olaf Scholz na dat Rebeet, wo se mit dat vele Water to doon hebbt hen.
Wo sall een mit psychisch opfällige Minschen an'n Hauptbahnhoff ümgahn? Hamborg deit sik nu mit Wien tosamen un will na en Lösen dörför söken. Öösterrieks Hauptstadt hett meist desülvigen Maleschen. Se wüllt nu Anbotten för Minschen schaffen, de krank an de Seel sünd un dorüm ok na de Ruuschmiddel- oder Alkoholiker-Szeen afglitscht sünd. Siet mehr as een Johr hett de Polizei dor an'n Hauptbahnhoff noch mehr en Oog dorop.
Blots poor Daag na en Metzenangreep in Mannheim is de Schandarm, de dorbi swoor an’t Lief to Schaden kamen is in’t Krankenhuus dootbleven. Överall in't Land sünd de Lüüd doröver ganz verfeert. De Beamte wull ingriepen, as en Mann op den Mannheimer Marktplatz söss Lüüd mit Metzensteken swoor versehrt hett. Folgens de Polizei is de Angrieper en 25 Johr olen Mann ut Afghanistan, de as Jugendlichen na Düütschland keem.
Bi'n Ümweltutschuss vun'n Bunnsdag geiht dat vundaag üm den Grenzweert vun Cannabis in'n Stratenverkehr. De Bund will den Weert ropsetten. Hamborg is dorgegen. Wat Binnensenater Andy Grote seggt, wöör dat Lockern vun den Grenzweert blots mehr Risiken in'n Vekehr mit sik bringen. De SPD-Politiker will en högeren Grenzweert verhinnern.
Dat is vundaag de mehrste Tiet dröög bi bet to 19 Graad. Dor bummelt teemlich vele griese Wulklen an’n Heven rüm, af un an pliert ok mal de Sünn dörch. Dat allens bi’n stieven Wind ut Noordwest.
Morgen schafft de Temperaturen dat twoors op bet to 20 Graad, man dorför kann’t denn ok de een oder anner Flaag geven.
Tokamen Week warrt in de EU wählt. To't Enn vun'n Wahlkamp sünd denn ok wedder de prominenten Politikers ünnerwegens – un dat ok in Hamborg. Güstern is al Annalena Baerbock vun de Grönen dor ween. Op'n Fischmarkt hett se ünner annern den Messangreep vun Mannheim veroordeelt. Se sä, Haat un Hisseree dröffen nich ween – egal vun wat för en Siet dat keem. In Mannheim sünd süss Minschen verletzt worrn – ok en Polizist mit dorbi: Bi em geiht dat üm Leven un Doot. De Mann, de ünner Verdacht steiht, is na ARD-Informatschonen en Afgahn, de 2013 na Düütschland kamen is.
US-Präsident Joe Biden hett en Fahrplaan för en Wapenroh in'n Gazastriepen vörstellt. He sä, dat weer Tiet, dat de Krieg in Gaza endt. De Amerikaners hefft tosamen mit Katar un Ägypten wat utklamüüstert – un Israel schall al Jo seggt hebben. Dat geiht üm en Wapenroh vun süss Weken. Dorto schullen Israels Suldaten ut de Rebeten vun'n Gazastriepen rut, wo veele Lüüd wohnt. Op de anner Siet schullen de Palästinensers welk vun de Geiseln freelaten, de se in'n Oktober ut Israel versleept hefft.