Tokamen Week warrt in de EU wählt. To't Enn vun'n Wahlkamp sünd denn ok wedder de prominenten Politikers ünnerwegens – un dat ok in Hamborg. Güstern is al Annalena Baerbock vun de Grönen dor ween. Op'n Fischmarkt hett se ünner annern den Messangreep vun Mannheim veroordeelt. Se sä, Haat un Hisseree dröffen nich ween – egal vun wat för en Siet dat keem. In Mannheim sünd süss Minschen verletzt worrn – ok en Polizist mit dorbi: Bi em geiht dat üm Leven un Doot. De Mann, de ünner Verdacht steiht, is na ARD-Informatschonen en Afgahn, de 2013 na Düütschland kamen is.
US-Präsident Joe Biden hett en Fahrplaan för en Wapenroh in'n Gazastriepen vörstellt. He sä, dat weer Tiet, dat de Krieg in Gaza endt. De Amerikaners hefft tosamen mit Katar un Ägypten wat utklamüüstert – un Israel schall al Jo seggt hebben. Dat geiht üm en Wapenroh vun süss Weken. Dorto schullen Israels Suldaten ut de Rebeten vun'n Gazastriepen rut, wo veele Lüüd wohnt. Op de anner Siet schullen de Palästinensers welk vun de Geiseln freelaten, de se in'n Oktober ut Israel versleept hefft.
Blots de Ogen sünd to sehn, de Rest vun't Gesicht man nich: Vun nu af an gifft dat an Hamborgs Scholen en Verbott vun Kledaasch so as Burkas un Nikabs. De Scholen warrt formell dorop henwiest, dat de Schölers an'n Maandag nich mehr heel versleiert na School kamen drööft. Koppdöker un mediziensch Masken: Sowat geiht man kloor.
In Bobarg is an'n Avend en Mann bi't Baden in en Baggersee ümkamen. In't Water güng em dat woll op mal gor nich goot. Man hett em noch an Land trocken un ok versöcht, em in't Leven torüchtoholen. Lüüd hefft hulpen, man de süsstig Johr ole Mann is denn noch dor an'n See dootbleven.
Eenmal in en Labor mit dorbi ween un bi Versöken tokieken: Dat geiht vundaag in Bahrenfeld. De Science City maakt för Gäst de Dören op un wiest, wo Forschers arbeit. Senatorsche Katharina Fegebank sä, de Dag schull wiesen, wo wichtig de Wetenschap för Hamborg is.
Vundaag wesselt sik Sünn un Wulken af. Dat mach ok ween, dat dat an'n Namiddag en lütt beten regent. De Temperaturen klattert op bet to fiefuntwintig Graad. Üm un bi dat Glieke gifft dat denn ok morgen noch mal: Sünn, Wulken – af un an Regen – bet to dreiuntwintig Graad.
18 Stunnen lang harr he den Hamborger Flooghaven lahmleggt – nu stünn he vör Gericht. En Familienvadder, de sien Dochter entföhrt harr. Güstern hett de Polizistin utseggt, de den Mann dorto kregen harr, optogeven. 16 Stunnen hett se mit den Mann an’t Telefon verhannelt. Un dat, wenngliek se keen besünnere Utbillen dorför harr. Man se kunn good Türk’sch schnacken. De Mann, de dormals dat Leid vun den Insatz harr, de meen, dat weer en ganz besünnere Leistung west.